La laitluid ka leit ka wan na Jingkieng Dam tang ïa ki kali ba hapoh 4 MT naduh mynta ka sngi

Shillong, Naitung 29 : Ka sorkar jylla ha ka sngi Nyngkong ka la pynbna ba la rai ba naduh ka sngi Ba-ar, ka 30tarik Naitung kin pyllait noh ban ïaid kali baroh arliang jong ka Jingkieng Dam.
Tangba, la rai ruh ba ïa mynta hi, ki kali kiba lah ban ïaid na katei ka Jingkieng kin dei tang kiba hapoh 4metric ton kaba mut tang ïa ki kali rit. Ïa kane ka rai la pyntip da u Myntri ka tnad Bording u AT Mondal hadien ka jingïalang jong ka High Powered Committee na ka bynta ka Umïam Dam and Bridge ba la pynïaid da u Symbud Myntri Rangbah ka jylla, Bah Prestone Tynsong.
“La rai ba naduh 30/7/2024 yn plie noh ïa kane ka jingkieng baroh ar liang bad ki kali kiba lah ban ïaid ki dei tang kiba hapoh ka 4 metric ton,” ong u Myntri haba kren bad ki lad pathai khubor.
Da kaba pyntip ba ka jinglut na bynta ka jingtrei baroh kynthup ïa ka Jingkieng bad ïa ka Dam ka la kot sha ka 19.9 klur tyngka, u Myntri u la ong ba ka tnad kan peit ruh ban buh da ki kynja jingker ha katei ka jingkieng ban pyntikna ba ki kali heh bad ki kali jrong kin ym lah ban ïaid lyngba.
“La shaniah ha ka PWD ban wad ki lad ki lynti ban buh ïa ki jingker kiba skhem khnang ba ki kali heh kin ym lah ban ïaid lyngba ka jingkieng,” u la ong da kaba bynrap ba na bynta ban pyntyllun ïa ka kam ki la buh ruh wat ïa ki kor CCTV ha katei ka jaka.
Shwa kane, u Myntri u la pyntip ba haduh mynta ka jingkhang ïa ki bos Night Super kan dang ïai bteng ban treikam katba ym pat pynbeit da kumwei pat da kaba buh hakhmat ïa ka jingkhia jong ki.
Lah ban kdew hangne ba kadei hadien kumba 7 bnai tam ne kumba 200 sngi tam ba ka sorkar ka la lah ban plie biang ïa katei ka jingkieng baroh arliang na ka bynta ban ïaid ki kali.
Ha katei ka jingïalang la donlang ruh naduh u Chief Secretary ka Sorkar Jylla, Bah DP Wahlang, nangta ki heh ka IIT Guwahati bad kiwei kiwei.