Nongpoh, Naitung 29: Ki runar bym lah ban ithuh durkhmat kila leit ban kyndang bad pynpait tala ïaka kamra buh Computer jong ka skul St. John’s Secondary School Jyntru bad rong tuh ïaki kor Computer, ki Projector ba pyndonkam naka bynta ban ai jinghikai ïaki khynnah skul.
Katkum ka khubor bala ioh lum la ong ba kane ka jingjia la antad ba ka jia hynnin ka miet ha kaba ki runar kila prong jubor da kaba pynpait ïaka tala bad rong lut ïaki Computer na katei ka skul bad ïa katei ka jingjia la lap nyngkong da kawei ka longkmie kaba pynkhuid ïa katei ka skul bad kaba la pyntip ruh mar mar sha ki nonghikai.
Hadien bala poi ki nonghikai la lap ba kawei ka kor komputer ruh kam don ruh ha kamra kaba ju ai jinghikai computer ïaki khynnah bad wat ki jaiñ pyrda ruh kila jah na katei ka kamra bala suba ba kitei ki runar kila song ïa kitei ki computer ba ki rongtuh haki jaiñ pyrda.
Shuh shuh ki bor pynïaid skul kila pyntip noh mar mar ïa katei ka jingjia sha ki pulit jong ka Nongpoh Police Station bad tang hadien katto katne por ki pulit kila wan poi ha katei ka jaka ban pynlong ka jingtohkit bad lap ruh ïa u snep sikret bad biri lyngkhot na katei ka kamra bala suba bret da kitei ki runar haka por ba ki leh ïa katei ka kam tuh.
Haba kren sha ki lad pathai khubor naka liang ka kong Veronica Santi Warjri Principal ka St. John’s Secondary School Jyntru kala pynpaw ka jingsngewkhia kaba jur halor katei ka jingjia kaba ki runar kila shu dusmon ïaki tiar ki tiar ba pyndonkam ban ai jinghikai ïaki khynnah skul, bad kim don ka mynsiem ban pyrkhat ïaka lawei jong ki khynnah skul.
Kala ong ruh haba kheiñ kyllum ka jingduhnong baroh kala poi kumba 3.56 lakh ba kynthup 5 tylli ki UPS, 6 tylli ki Monitor, 5 tylli ki CPU, u wei u Projector ryngkat ki Mouse ki Keyboard bad kiwei kiwei ki tiar.
Ki bor pynïaid skul kila ujor ruh da ka ejahar ha Nongpoh PS bad ka jingtohkit halor katei ka jingjia ka dang ïaid shakhmat ban thwet bad lapdien ïa kitei ki runar ba donkti ha katei ka kam.
