Shillong, Jymmang 27: U Myntri Rangbah ka jylla u Conrad K Sangma uba dei u National President ka NPP bad kumjuh ruh u bah Kitborlang Nongrem President jong ka National People’s Youth (NPYF) mynta ka sngi ki la pynshai ba ka National People,s Party (NPP) kala dep ïoh ïa ka jingbit na ka ophis jong ka MUDA ban shna ïa ka ophis jong ka party bad kumjuh ïa ka shithi bym don jingujor na ka ophis jong ka Deputy Commissioner ka East Khasi Hills District haba ïadei bad ka jingtei ïa ka ophis. Kumta ki jingkynnoh jongka Congress ki long kiba ym don nongrim satia.
Haba kren sha ki lad pathai khubor u Myntri Rangbah ula ong “Ngi la dep ïoh jingbit da ki kot ki sla na ka MUDA naduh u 22 tarik Nohprah 2020 bad dei hadien kane ba ngi sa sdang ban tei ïa ka ophis. Kumta ki jingkynnoh jong ka Congress ki long ki bym don nongrim haei haei ruh namar baroh ki kot ki sla ba dei ban ïoh la dep ïoh”.
U la ong kiba kum kine ki jingkynnoh ki long tang ki jingthmu ban shu pynjah burom khlem nongrim da ka Liang Pyrshah. “Namar dei hadien ba ngi la dep ïoh ïa ka jingbit ha ka 22 tarik Nohprah 2020 ba ngi sa shah ban sdang ïa ka kam bad hadien kata ym don jingthoh shuh ba wan na ka MUDA sha ka NPP.
Kumjuh ruh na ka liang u President ka National People Youth Front (NPYF) mynta ka sngi Thohdieng u la dawa ïa ki nongïalam jong ka Meghalaya Pradesh Youth Congress (MPYC) ban panmap mardor halor ka jingkynnoh ba ka National People’s Party (NPP) ka la shna ïa ka ophis treikam ha Bivar Road, Polo, Shillong khlem da ïoh ïa ka jingmynjur na ka Meghalaya Urban Development Authority (MUDA).
U State President jong ka NPYF u Bah Kitboklang Nongrem ha ka jingïakren bad ki lad pathai khubor u la sei da ka dulir kaba pynshisha ba ka MUDA ka la ai jingbit ban shna ïa ka ophis treikam jong ka NPP naduh ka 22 tarik u bnai Nohprah, 2020 bad ïa ka No Objection Certificate (NoC) ban shna ïa ka ophis treikam na ka ophis jong ka Deputy Commisioner ka East Khasi Hills District kaba la ïoh ha ka 26 tarik u bnai Kyllalyngkot, 2021.
“Ka NPP ka don lut ïa ki kot ki sla ba ngi ïoh na ka MUDA bad na ka ophis jong ka Deputy Commisioner bad kine ki ar tylli ki kot ki dei kiba ngi la pynshisha,” u la ong.
U la kynnoh ruh ba ki nongïalam jong ka MPYC ki la shu ïalam bakla ïa u paidbah bad ong ruh ba ka jingkynnoh ka dei tang ka jinglong khyllung khynnah kaba khlem don ïa ki jingshisha.
“Nga pynrem jur ïa kum kine ki jingkren kiba ïalam bakla ïa ki nongshong shnong jong ka jylla,” la ong shuh shuh u Bah Nongrem.
U la maham ruh ba lada ki nongïalam jong ka Meghalaya Pradesh Youth Congress kim lah ban panmap hapoh khyndiat sngi hynrei lym kumta ka NPP kam banse ban ïaid shakhmat ban leh da kaba tyngeh.
“Lada kim lah ban panmap, na ka liang jong ka party kan ym shong kli kti halor kane,” u la ong bad bynrap ruh ba ka jingkynnoh ruh ka dei kaba la shu kynnoh lamler khlem nongrim.
