Khlem pyndem ka Meghalaya ha ka sorkar NDA sha ka 29 tarik Naitung pynkynriah rakhe NEP 2020
Shillong, Naitung, 23: Ha ka sien ba nyngkong eh ba ka sorkar MDA hapoh ka jingïalam jong u Conrad K Sangma kum u Myntri Rangbah ka la rai ban ïeng pyrshah ïa ka rai ne hukum jongka sorkar NDA ba ïalam da u Modi ban pynlong skul beit ha ka Sngi U Blei kata 28 tarik Naitung 2024 ban rakhe ïa ka jingdap saw nem ka National Education Policy (NEP) 2020. Ka ophis jong ka State Education Mission Authority of Meghalaya (SEMAM), Samagra Shiksha Abhiyan (SSA) lyngba u State Project Director u Swapnil Tembe uba dei ruh u Director jong ka State Education and Literacy (SE&L) ha ka sngi Baar u la pynmih ïa ka jingpynbna ba la pynkynriah noh sha ka 29 tarik Naitung, 2024 kaba hap ha ka lah Sngi u Blei ha kaba ïadei bad ka jingpynkut ïa ka jingrakhe ka jingdap 4 snem ka jingïaid lynti jong ka National Education Policy (NEP) 2020.
Ka jingpynkylla noh ïa ka tarik ka dei namarba ka Ministry of Education ka Sorkar India ka la buh sngi ban pynkut ïa ka jingrakhe ha ka sngi u Blei, ka 28 tarik, Naitung, 2024.
U Myntri ka tnat Pule Puthi ka Sorkar Jylla u Rakkam A. Sangma lyngba u kyrwoh ba la phah sha ki lad pathai khubor u la ïathuh ba kane ka jingpynkynriah noh ïa ka jingrakhe sha ka Lah Sngi u Blei ka long namarba ka Sngi u Blei ka dei ka sngi mane Blei jong ki nongshong shnong Khristan ha ka Jylla Meghalaya.
“Kum ka jingpynkhreh ïa ka jingrakhe ïa ka National Education Week, ka Ministry of Education ka Sorkar India ka la buh hynriew sngi ban pynlong ïa ka jingrakhe ïa ka jingïaid lynti kaba saw snem ka National Education Policy, 2020 ha India kaba la sdang naduh ka 22 tarik mynta u bnai bad ban pynkut ha ka 28 tarik mynta u bnai. Ha Meghalaya ngi la sdang ïa ka jingrakhe haduh ka 22 tarik, Naitung bad ka ban bteng haduh ka 28 tarik, Naitung. Namarba ka 28 tarik, Naitung ka hap ha ka sngi u Blei, ka sngi mane Blei jong ki Khristan ha ka jaka ka sngi u Blei, ngi la pynkynriah noh sha ka Lah Sngi u Blei, ka 29 tarik, Naitung, 2024,” la ong u Sangma.