Na ka 253 lak, 60 tylli ki ïing baduk, 200 tylli ban moramot, 500 ngut ki nongrep bad treikam lajong

Shillong, Naitung 23: U Bah Ardent Miller Basaïawmoit, MLA Nongkrem, mynta ka sngi, u la pyllait paidbah ïa ka MLA Scheme jong u snem 2023-’24 baroh 250 lak tyngka bad kynthup ruh ïa ka 3 lak tyngka, kaba dei na ka ISYDP, kaba long baroh 253 lak ne 2.53 Klur tyngka.
Na kane ka 253 lak tyngka, u Bah Ardent u la mang na ka bynta ki 60 tylli ki ïing baduk mar 75 hajar tyngka kawei, kaba long baroh 45 lak tyngka.
Nangta 200 tylli ki ïing mar 25 hajar tyngka kawei na ka bynta ban pynbha ne pynkha kamra kaba long baroh 50 lak tyngka. Nangta ka jingiarap kaba mar 10 hajar tyngka sha ki 500 ngut ki nongrep bad ki briew kiba seng ki dukan rit ne ki kam la jong bad ka long baroh 50 lak tyngka.
Nalor kine, u Bah Ardent, u la pynmang ruh na ka bynta ka jingshna ia ka skul Pomlakrai Presbyterian Secondary School, Pomlakrai 20 lak tyngka, nangta ka skul Lumkynsai Presbyterian LP & UP School, Smit 12.50 lak tyngka, ka Nongkrem Presbyterian Secondary School 15 lak tyngka, St. John Bosco School, Laitkor Mawrie Lumheh 10 lak tyngka, ka HL Mizo LP School, Madanryting Them Basuk 10 lak tyngka, nangta ka jingker kynroh ïa ka phyllaw jong ka Skul Hedrik Memorial Unitarian Upper Primary School, Nongkrem2.5 lak tyngka, ka jingtei ïa ka Podium bad Gallery (First Phase) jong ka Madan Phutbol ha Laitkor 15 lak tyngka, ka jingshna pynheh ia ka Madan Phutbol bad kynroh ha madan Phutbol Mawpynthaw 15 lak tyngka, ka jingshna ia ka Skul jong ki khynnah baduk jong ka Shillong Reach Ministries 5 lak tyngka.
Nangta la sam ruh mar 50 hajar tyngka sha ki 6 tylli ki Sports Club kaba long 3 lak tyngka. Kita ki long ka Madanryting Sports Club, Pomlakrai Sports Club, Dongmusa Sports Club, Umphyrnai, Smit Sports Club, Umphrup Sports Club bad Nongkrem Sports Club.
Haba ai jingkren shuwa ban sam ïa kine ki skhim, u Bah Ardent u la pynshai ruh halor ka 10 lak kaba dei ka Discretionary Grant kaba la kren bha da ki katto katne ki MLA ha kine ki skhim. U la ong ba kane kadei ka skhim ba la ai da ka Assembly sha ki MLA ban ïarap ïa ki paidbah ha ka por ba pang ba shitom. “Na ka bynta kiwei ki MLA ka 10 lak ka long ka jingïathuh khana sarong ba ïoh ïarap ïa kiba pang ba shitom, hynrei na ka bynta jong nga bad ki MLA ka VPP ka long ka jingktha khlieh, namar ngi sngewthuh ba kane ka pisa kam dap satia ban ïarap ïa kiba pang ba shitom”, la ong u Bah Ardent.
Dei namar kane ka daw u la ong ba um ju hikai ïa ki paidbah ban wan ïeng laiñ sha ïing ki MLA ban ap ban dawai, hynrei ka VPP ka kwah ba ka sorkar ka dei ban pynbiang ïa ki jaka sumar, ki dawai dashin ha ki jaka sumar, khnang ba ki paidbah kin suk.
Lyngba kane ka Grant, u Bah Ardent, u la ong ba ka kyndon kam shah ban ïarap palat 15 hajar tyngka bad na kane ka 10 lak tyngka ruh lada iarap tang mar 5000 tyngka ruh kan dap tang ia kumba 200 ngut ki nongpang. “Hato kat ha Constituency yn don tang 200 ngut ki nongpang?”, la ong. Hynrei u la ong pat ba haba ong kumne kam mut pat ba ki MLA ka VPP kim ju ïarap haba don ba pang ba shitom, hynrei kam dei pat ïa ki ban ïathuh khana briew ban leit ai khubor ba la iarap ban dawai bai sumar ïa ki paidbah. “ Namar ba kane ka 10 lak kam dap ban ïarap ïa ki paidbah ba pang ba shitom, ngi hap sei na pla la jong ruh, tangba ngim ju kop sarong pat”, la ong u MLA Nongkrem.