Ujor ka FKJGP ba jur ka jingshah khrong beaiñ ki kali kit mar-rep ha surok bah

Shillong,Naitung 22 : Ki nongïalam jong ka FKJGP ha ka sngi Nyngkong ryngkat ka kynhun ki nongrep ki la ujor sha ka Myntri ka tnad ka Rep ka Riang ka sorkar jylla Kong Ampareen Lyngdoh halor ka jingshah pyndik palat ki kali ba kit mar rep da kaba shah khrong khajna beaiñ ha ki surok bah.
Haba kren bad ki lad pathai khubor u President ka seng, Bah Dundee Cliff Khongsit u la ïathuh u la ïathuh ruh ba ki la ïoh jingtip ba ki don ki kali kit mar rep kiba shah khrong naduh 500 tyngka bad ter ter haduh 1500 tyngka ruh.
Katkum ka jingïathuh jong u, ïa kane ka pisa la khrong da ki briew kiba suba ba ki dei ki riew shim kabu namar lada kim siew kin ym pyllait satia ïa ka kali jong ki.
“Kumta, ha ka jingïalang, ngi la kyntu ïa ka Myntri ban pynmih noh da ka ‘Road Delivery Challan’ khnang ba ki kali kit mar rep kin lait naka jingshah khrong pisa beaiñ,” la ong u Bah Dundee.
Nalorkata u ong ruh ba lada ki nongrep ki lait na kitei ki jingshah khrong beaiñ ka jingmyntoi kan dei ïa ki nongrep kumjuh ïa ki nongkhaïi kiba dei hi na ka rilum Khasi bad Jaintia bad na ka jylla hi.
Ha kajuh ka por ki nongïalam ka seng ki la kyntu ruh ïa ka Myntri ba kan phah maramot noh ïa ki surok ha ki bynta jong ka thaiñ East Jaintia Hills na ka bynta ban pynsuk ïa ka kit ka bah ïa ki mar rep lyngba katei ka thaiñ.
Na ka liang ka Myntri pat haba kren bad ki lad pathai khubor ka la ïathuh ba shen kan sa ïa syllok bad ki ar tylli ki tnad ba dei peit, kata ka tnad Transport bad kumjuh ruh ïa ka tnad Kampohiing ka jylla haba ïadei bad katei ka jingpyntip da ka seng halor ka jingeh ban kit ïa ki mar rep na kane ka jylla.
“Ïa mynta hi ngam pat nud ban ong ei ei hynrei kaba donkam ka long ba nga hap ban ïa syllok shwa bad kitei ki ar tylli ki tnad bad kumjuh ruh bad ka District Council,” ka la ong.
Ka Myntri ka la pynshai ruh ba kadei ka kamram jong ka sorkar ban peit ba ka jingïarap ka dei ban long lang ïa ki nongrep bad kumjuh ruh ïa ki nongkhaii namar lada baroh ki ïaid beit ka jingmyntoi kadei ïa ki hi baroh arliang mamla.
Ha kajuh ka por ruh ka la ong ba hadien ba ka la dep ban kynduh bad syllok ïa baroh ki tnad ba dei peit kan sa khot biang pat ïa ki la kumno kumno shwa ka Independence Day.