Yn hiar Delhi biang ka HANM ban tied jingkhang ïa ka Sorkar India ban dawa ïa ki lai tylli ki mat

Mawkyrwat, ‘Naitung 22: Ha HANM jong ka Central Body kan sa hiar biang ban leit tied jingkhang ha Nongbah Delhi ban pynsngew bad ban leit dawa ba ka sorkar India lyngba ka Home Ministry ka dei ban pynurlong noh ïa ki lai tylli ki mat jingdawa kata ka long ban pynbeit ïa u pud u sam uba biang, ban pynrung noh ïa ka ktien khasi ha ka 8th Schedule bad ban pyntreikam pura ïa ka ILP khnang ba kan long ka jingmyntoi ïa ka pateng pakit ka ban wan.
Halor ka jingthmu jong ka seng ban leit hiar biang sha Nongbah Delhi ka dei lyngba ka jingpynsngew jong u bah Lamphrangsngi Kharbani, President jong ka HANM Central Body haba kren ha ki lad pathai khubor hadien ka jingïalang pyntian-smai ïa ki nongkitkam ba thymmai jong ka HANM ha Community Hall, Mawkyrwat, South West Khasi Hills District.
Shuh shuh u la ong ba ka seng ka la dep ban rai ïa kane naduh u snem 2023 jong u bnai Naiwieng, bad mynta ruh ki la don ha ka lynti jong ka jingpynkhreh ban leit tied jingkhang biang khnang ba ki mat jingdawa kin urlong.
Ymtang kata, u la ïathuh ruh ba katkum ka shithi na ka Sorkar India sha ka HANM, la kren shai ba ha kaba ïa dei bad ka Border Issue na ka liang ka Sorkar India ka la dep ban phah sha ka Central Division kaba dei peit ïa ki tnad kam pud kam sam ba kan pyndep ïa ki jingdonkam baroh.

Ha kaba ïa dei bad ka ktien khasi bad garo, na ka liang ka Sorkar India kan sa leh ïa kaba donkam katkum ka jingkwah jong ki paidbah ka Jylla Meghalaya katba ha kaba ïa dei bad ka ILP pat haduh mynta kam shym la ong hooid ne em.
Namarkata, kum ka Seng kan nym shongkli-kti hynrei kan ïai tied ïa ka jingkhang jong ka sorkar India ba kan pyndep bad pynurlong ïa ki jingdawa.