Da ka jingïakop siat khnam tynrai pynlong ka KSU, rah ka kynhun Shillong A bad u K.H. Sohshang

Mawkyrwat, ‘Naitung 17: Ka Khasi Students Union (KSU) jong ka South West Khasi Hills District mynta ka sngi ka 17 tarik u ‘Naitung, 2024 kum ka dak jong ka jingrakhe ïa ka lyngkhuh sngi ïap ba 189 jong u Syiem Tirot Sing Syiem ka la pynlong ïa ka jingïakop rong biria u khasi ne ka jingïakopsiat khnam katkum ka tynrai u khasi ha Bamjngiem, Tynrong hajan Mawbynna, Mawlangwir, South West Khasi Hills District.
Ha kane ka lympung ïa kop siatkhnam la wan ïa shimbynta naduh ki ‘riew rangbah bad ki khun samla kiba dei na kylleng ki shnong hapoh jong ka South West Khasi Hills District bad kiba hapoh ka Bri u Hynñiewtrep baroh kawei kiba kynthup ïa ki 24 tylli ki kynhun bad ki riew shimet pat ki don baroh 71 ngut.
Ki nongjop ki long ha ka jingïakhun para marwei la rah da u bah K.H. Sohshang, ba ar u bah S. Rynjah bad ba lai u bah Nepaland Lyngkhoi. Ki nongjop ha ka kynhun pat dei ka kynhun Shillong A, ba ar dei na ka kynhun Hima Pamsanngut bad ba lai dei ka kynhun Shillong C. Kitei ki nongjop ki la rah ïa ka khusnam ryngkat ka song pisa ba ka seng ka la pynkhreh ha la ki kyrdan kyrdan.
U kongsan ha kane ka sngi u dei u bah Shalkitbok Kharbani, Assistant Education Secretary jong ka KSU Central Body bad ha ka jingkren jong u u la pynkynmaw ïa kiei kiei kiba la jia ha ka mynnor ha kaba ka jingïaleh thma ka dei tang da u khnam bad ka tyntih bad u la pynkynmaw ruh halor ki katto katne ki jingïaleh jong u Syiem Tirot Sing Syiem pyrshah ïa ki phareng ha ki spah snem kiba la leit bad kane pat ka dei ka sngi ba kum ka ri bad ka jaidbynriew ka kynmaw ïa ka ïap jong u kaba la kot mynta haduh 189 tylli ki snem.
Haba kren ha kaba ïa dei bad ka lympung ïa siat khnam, u la pynkynmaw ba kum ki samla bad ki riew rangbah jong kane ka juk mynta ki dei ban pynneh bad phai dien ïa kaei kaba u longshwa manshwa u la buh namar ha u khasi hi naduh mynshwa ki ai ïa u khnam bad ka ryntih ban leh sngewbha rong biria khlem da don kano kano ka jingïashun ne peit mad-dong bad ka dei ruh shibynta ban hikai ïa u shynrang khasi ban nang ban bat ïa u khnam ka ryntih.
U la ong ruh ba kane ka jingmih jong ki rangbah bad ki samla ban ïa shimbynta ha kane ka lympung ïa siat khnam ka long ba haba ki tan ïa u khnam shadien bad siat sha khmat ka long thik kumba phai dien ïa ki kam ba ki longshwa manshwa ki la leh bad nangta ngi sa ïaid shakhmat ban ïada ïa ka ri bad ka jaidbynriew, ban kyntiew bad pynneh pynsah ruh ïa ka.
Shuh shuh u la pynkynmaw ruh ba ha riti dustur u khasi ïa u shynrang hi la jer la thoh ïa ka kyrteng jong u ha ki lai tylli ki khnam kata u khnam ba nyngkong u dei u nongïada ïa lade shimet, u khnam ba ar u nongïada ïa ka ïing ka sem, ka kur ka jait, bad u khnam uba lai u nongïada ïa ka ri bad ka jaidbynriew.
bad ki nongkren ki kynthup ïa u bah Kitboklang Syiemlieh, President barim jong ka KSU South West Khasi Hills District kum u symbud kongsan, u ah Forwardman Nongrem, President ka KSU South West Khasi Hills District, u bah Wallam Syiemiomg, Chairman jong ka Synjuk ki Seng Samla Shnong, South West Khasi Hills District, u bah Kenesjune Lyngdoh Nonglait, President ka FKJGP, South West Khasi Hills District, u bah Kyllang Thongni, President ka HNYF, South Eastern Border Area, u bah Koland Lyngdoh, Secretary Shnong Mawlangwir.
Ïa ka jingïalang la pynïaid da u bah Pauldeep Tongwah, Sports Secretary jong KSU South West Khasi Hills District.