Ban phah maramot ïa ki jingkieng dieng ha ka lynti Mawsynram – Ranikor: phah jingthoh ka HANM ha u DC

Mawkyrwat, ‘Naitung 10: Ka HANM, South West Khasi Hills District Mawkyrwat bad ka HANM, Ranikor Circle da ka jingthoh ka la phah sha u Deputy Commissioner jong ka South West Khasi Hills District ban buh jingkyrpad ba un tuklar lem ïa ka tnad PWD (Roads) Ranikor Division ban phah maramot noh mardor ïa ki jingkieng dieng kiba don ha ka surok Mawsynram haduh Ranikor.
Ym tang kata, ki buh ruh ka jingkyrpad ba dei ruh ban maramot ïa ki jingkieng dieng kiba don ha ka surok na Mawkyrwat sha Ranikor namar ha ka jingleit jurip jong ka HANM ïa ki jingkieng kaba don ha kane ka surok ki shem bad lap ba ki jingkieng dieng baroh ki la jot rathai sha ba palat bad kan sa poi ruh ka por ba kin sa dkut noh ha kano kano ka por.
Namarkata, khnang ba kan ym don kano kano ka jingeh ha ka ïaid ka ïeng ne kan ym don ka jingduh nong ïa ki paidbah jong ka dong ka thaiñ khamtam ïa kiba pang ba shitom kiba donkam kyrkieh ban hap ban phah sumar ha kiwei ki jaka sumar kum ha Shillong ne ha Mawkyrwat. Ym tang kata ki la buh ruh ka jingkyrpad ïa u Deputy Commissioner ba un phah khang noh shuwa ïa ka jingïaid kali kit palat pud katba ym pat dep ban maramot ïa ki jingkieng.