Shillong Naitung 09: U Bah P N Syiem Symbud CEM ka KHADC uba khmih ruh ïa ka tnat Elaka hapoh ka EC ka KHADC u la ïathuh ba ka Executive Committee kaba la long ha ka sngi ba-ar ka la ïakren haba ïadei bad ka jingai Raid ïa ka shnong Majai kaba dang hab hapoh ka Hima Sohra.
U la ong ba ha ka jingïakren ka la don ruh ka jingai jingmut ban khot ïa ka Hima Sohra halor kane ka jingpynbna ai Raid bad kan khot ruh ïa ki riew paidbah bad ki riewshem phang ban ai jingmut halor kane ka kam.
Haba mynjur ba na ka liang ki Khun ki Hajar jong ka Hima Sohra ba dangshen ki la pynpaw ïa ka jingma na kane ka jingai Raid bad ba ka jingai por jong ki ka la kut ha ka 9 tarik mynta u bnai ba ka KHADC kadei ban pyndam noh ïa katei ka jingpynbna, u Bah Syiem u la ong ba ka KHADC kan sa khot lang ïa ki riew Rangbah ban ai jingmut kumno ban pynbeit pynryntih ïa kane ka kam bad ïa kane ka mat ka KHADC ka dang khmihbniah ha kata ka rukom ba kan ym ktah ïano ïano ruh.
Haba ïadei bad ka jingai por kaba la kut mynta ka Sngi u Bah Syiem u la ong, “Haoid ki la ai por ïa ngi haduh mynta ka Sngi bad lada ki wan ban kynduh biang ïa ngi ngin sa pyntip ïa kaei kaba la ïakren thymmai wat la ka KHADC ka dang ïaid shakhmat haba ïadei bad kane ka kam.”
