Shillong, Jymmang 26 : Ka Joint Action Committee jong ki 11 tylli ki shnong ba kynthup naduh Nongrim Sadew, Mawkriah, Laitjem, Sadew, Marbañiang Umseiñiong, Riatmawñiew, Bañiun, Pomlum, Mawñianglah bad Mawrashe ki la kynduh ïa u Symbud Myntri Rangbah ka Jylla, Bah Prestone Tynsong ban pyntip ba ki paidbah na kitei ki thaiñ mynta ki la hap ban leit siew bai bording shaduh Shillong watla mynshwa ki donkam ban leit siew tang ha 6Mer ba la tip kum ka Upper Shillong Distribution sub-division.
Haba kren bad ki lad pathai khubor hadien ka jingkynduh ïa u Symbud Myntri Rangbah na ka liang u Convener jong ka JAC u la ong ba ki paidbah baroh shi katta lada donkam ban aplai bording thymmai ruh ki leit tang ha 6Mer hynrei mynta kynsan kynsan la pynngat ïa ki sha ka Umlyngka Distribution sub-division kaba mut ki hap ban leit shaduh Shillong na bynta ki kam baroh.
“U Convener u la ïathuh ruh ba ha ka jingïakren, u Symbud Myntri Rangbah u la kular hangtei hangtei hi ba kitei ki 11 shnong kin neh beit hajuh kata ha Upper Shillong sub-division kumba ki neh baroh shi katta.
“U la pynpaw ruh ba kumno ki leh ïa kane baroh khlem ka jingtip bad ong ba ka dei ka bym lah ban long ba ki shnong ki hap ban ïaid lait na ka ophis kaba don hajan bad hap ban leit shaduh Umlyngka.
