Lah palat 15 sngi mynta ki kali ki dang ïaid tang shiliang ka surok NH-6 ha Narpuh

Khliehriat Jymmang 26: Ka Khasi Students Union Narpuh Circle, ka pynpaw ka jingsngew khia namar ka jing bym pat bit pat biang bha ka surok national higway ha ki thaiñ Narpuh bad ka seng ka dawa na ka National Highway Authority of India ba ka dei ban shim khia mardor ban pynkhuid lut ïa ka khyndew, ïa ki dieng, ki maw kiba dang don ha surok bad kah lynti ïa ki kali kiba leit ba wan na katei ka surok.
Ha kaba iakren bad u Mawphor, u President ka KSU Narpuh Circle, u bah K.S.Suchiang u la pynpaw bad ong ba“Naduh ka por ba twa ka khyndew, ba twa ki lum bad twa ki maw ha ki surok national highway ha ki thaiñ Narpuh, kaba la palat mynta la 15 sngi, ka jingiaid ki kali kam pat bit pat biang bha, ha kaba tang shi liang ka surok ki kali ki iaid bad ka jingdheng kali ruh ka dang jia khah khah ha kitei ki thaiñ naduh Tongseng ter ter shaduh Malidor bad kane ka dang buh jingeh ïa ki nongleit nongwan kiba iaid lyngba na katei ka surok”
Kawei ruh kaba buh jingeh ïa ki nongleit nongwan bad ki nong ñiah kali ka dei ka jinglang um hapdeng surok namar kiba bun ki bynta jong ka surok ki la pei thliew bad lang um, bunsien ki kali khamtam ki kali rit ki ju sahkut bad kynduh jingeh namar ka jingpei thliew ka surok, kane ka jingpei thliew ka surok ka jur bha ha ka jingkieng Tongseng bad kumjuh ruh ha kiwei kiwei ki jaka ha ka thaiñ Narpuh.
Utei u nongialam jong ak KSU na Narpuh, u la kynthoh jur ruh ba balei ka NHAI kam pynbiang shibun ki JCB ki ban pynkhuid bha ïa ka khyndew bad balei ka shimpor haduh lah jan shiteng bnai ban pynkhuid lut ïa ka khydew kaba dang kah lynti shiliang ka surok namar ki kali mynta ki dang lah ban iaid tang shiliang ka surok.
Ha kajuh ka por, u bah Suchiang, u la ong ruh ba ka jinglum khajna ka NHAI na ka Tool Gate Plaza ha Lumshnong kan long ka bym don jingmut eiei lada ïa ka kam kam lah ban pynbiang bha ha ka rukom kaba dei ka ban pynsuk ïa ki nongleit nongwan, namar na kane ka national higway da ki hajar tylli ki kali ki iaid man ka sngi namar ka dei ruh ka surok kaba ki ju iaid lyngba ki briew kiba na ki jylla bapher bahper jong ka thaiñ shatei lam mih ngi.
Ka seng ka dawa ruh na ki bor synshar district jong ka East Jaiñtia Hills District ba ka dei ban shim khia ban peit lem halor ki jingeh ba ki paidbah ki ïa kynduh ha ka leit ka wan, kito kiba iaid lyngba na ka national highway ha ki thaiñ Narpuh, ka seng ka dawa ba dei ban weng noh kloi ïa kum kane ka jingeh ha ka jingdheng kali kaba khah khah ha ka surok national highway ha ki thaiñ Narpuh.