Shillong, Naitung 02: Ki khun ki Hajar jong ka Hima Sohra ki la dawa na u CEM ka KHADC ba u dei ban wengnoh mardor ïa ka jingpynbna No.DC.XXVII/Genl/66/23-24/157 kaba 24 tarik, Jylliew 2024 kaba la ai Raid kyrpang ïa ka shnong Majai kaba dang hab hapoh ka Hima Sohra.
Ha ka shithi dawa ba ki la phah sha ka KHADC ki la dawa badei ban wengnoh ïa katei ka hukum kaba la pynbna.
Kitei ki khun ki hajar kiba la soi kyrteng kumba 6 ngut ki la ïathuh ba ka Majai kadei kawei na ki shnong kaba hab hapoh ka Hima Sohra, kumta ka jingai Raid ïa ka Shnong Majai khlem ka jingtip bad khlem ka jingmynjur lang jong ka Dorbar Hima ka long kaba ym lah ban pdiang dalei lei ruh.
Ki la ïathuh ruh ba ha Majai la shong shnong da kiba bun ki bym dei ki Khasi ha kaba ki Khasi ki don tang kumba 10 na ka shispah ne 10%, kumta ka jingai Raid kyrpang ïa ka Majai ka long kumba aibor ïa ki bym dei ki Khasi (Raïot) ba kin ïoh synshar mon bad laitluid hapoh ka Hima Sohra bad kumjuh ruh ha ka Ri Khasi baroh kawei.
“Kumta da kane ngi phah ka kyrwoh kaba khlaiñ bha ba lada phim weng mardor ngim banse ban shim da kawei pat ka sienjam kaba phi hap ban kitkhlieh,” ong kitei ki 6 ngut kiba la soi kyrteng kiba dei Bah M Bynnud, A Diengdoh, S Kynta, K Nongkynrih, S Laloo bad J Kynta kiba dei ruh ki Convenor ki Khun ki Hajar ka Hima Sohra.
