Bom iap u briew ba don jingduna ia 2 ngut kynthup ka Longkmie ha Sabuda
Pyrshang ki Pulit Assam ban tuklar

Nongpoh, Jymmang 25: Ha kawei na ka jingjia ba sngewsih kaba la jia mynta ka sngi ha ka shnong khappud ka Raid Nongtung kata ha ka shnong Sabuda, ki ar ngut ki la khlad noh bad kawei ka khynnah ba dang rit ka rta ka la mynsaw jur, kaba dei hadien ba ki la shah bom shah tied ha uwei u rangbah uba la kynnoh b au don ka jingduna ha ka liang ka bor pyrkhat pyrdaiñ.
Kane ka jingjia ka la jia mynta ka step ha ka shnong Sabuda ha ka por 10.30 baje mynstep, ha kaba la kynnoh ba u Sheltiroy Mukhim, uba don ka jingduna ha ka bor pyrkhat u la bom la shoh ïa kitei ki lain gut bad ha kane ka jingjia ka longkmie ka khlad hashen bad uwei pat u la mynsaw jur bad la rah sha NEGIRIMS Civil Hospital ban ioh ïa ka jingsumar, hynrei ha kane ka janmiet la pynbna da ki Doctor ba une ruh u la khlad noh na ka daw ka jingmynsaw jur.
Kane ka longkmie kaba la khlad noh la tip kyrteng kum ka Kong Dribon Mukhim kaba la don 47 snem ka rta bad u rangbah ba la khlad noh ha NEGIRIMS Hospital Shillong la tip kyrteng kum u Rilan Mukhim uba la don 49 snem ka rta bad kawei pat ka dei ka heprit kaba la shu mynsaw ha kane ka jingjia.
Halor kane ka jingjia, na ka liang u Border Magistrate ka Ri Bhoi, u Raja Brahma u la hiar mardor sha katei ka shnong ban tohkit halor kane ka jingjia, hynrei ha kaba nyngkong ki Pulit ka Assam ki la thmu ban shimti ban leh katkum ki kyndon ka ain sha ka sorkar Assam, hynrei dei lyngba ka jingtuklar u border Magistrate la aiti noh ban leh ïa kane ka kam ha ki Pulit ka Ri Bhoi na Mawlasnai Police Outpost.
Kumba la ioh lum jingtip, la ong ba na ka liang ki Pulit ka Ri Bhoi ki la leit ban shimti ïa ka met katei ka Longkmie ban wan rah sha Civil Hospital Nongpoh ban pyndep ïa ka post mortem examination bad utei u rangbah pat u la khlad noh ha NEIGRIMS Hospitla Shillong hapdeng ka jingsumar ki Doctor na ka daw ba u la mynsaw jur ha kane ka jingshah bom shah tied ha utei u rangbah ba don ka jingduna ha ka bor pyrkhat.
La ong ruh ba ïa utei u rangbah uba la bom la shoh ïa kitei ki ar ngut haduh ba ki la duh noh ïa la ka jingim la shimti da ki Pulit ka Ri Bhoi bad la rah noh sha Civil Hospital Shillong na ka bynta ka jingsumar bad halor kane ka jingjia, ki Pulit ka Ri Bhoi ki dang pynlong ia ka jingtohkit kaba bniah ban leh katkum ki kyndon jong ka aiñ, ong ka tyllong khubor ba la ioh lum da u Nonghoh Khubor.