Shillong, Jylliew 28: Ka seng “Federation of Person With Disabilities” ha ka sngi Thohdieng kila ïa kynduh ïa u Myntri Rangbah ka jylla u Conrad K Sangma ha kaba kila pynsngew ïa ka jingeh ka jong ki kaba kila buh ha khmat ka sorkar.
Ka seng ha kane ka jingïakynduh ki la kyntu ïa ka sorkar ban pynkiew ïa ka baibam jong ki ïa kiba la poi ha ka kyrdan klass X ban pynkiew na ka T.1500/- tyngka sha T.3000/- tyngka katkum ka RPWD Act 2016 Chapter V, section 24 clause- (h).
Ka seng ka la kyntu ïa u Myntri rangbah ban pynlait ïa ka pisa na ka bynta kiba kiba la apply ïa ka jingïarap na ka Chief Minister’ Social Assistance, kiba la apply naduh u snem 2023, namar kim don jingïoh da kum wei pat lait noh na kane ka jingïoh.
Na ka bynta kiba don ka jingduna ha ki dkhot met kiba trei kum ki Muster Roll ha ki tnad sorkar bapher bapher, la kyrpad ïa ka sorkar ban kan pdiang noh ïa ki kum ki nongtrei sorkar kiba pura ha ka kyrdan D.
Katkum ka RPWD Act 2016 Chapter VI section 33 (clause i-ii) ka federation ka kyntu ïa ka sorkar ba kan thung uwei ban long dkhot hapoh ka MPSC bad DSC ban peit ïa ka thung kam thungjam na ka bynta kiba don jingduna ha dkhot met.
Ka sorkar ka dei ban peit ruh kino ki kam kiba lah ban mang na ka bynta ki kam sorkar shuwa ba ka sorkar kan phah pynmih ïa ki jingpynbna lait kam, ïa kane ka jingkynduh ïa u Myntri Rangbah la ïalam da u President bah Ferdinand L Marshilong kum u Chairman bad ka kong Ibadalin Kharbuli General Secretary.
