Shillong Jylliew 28: U Myntri Rangbah ka jylla u Conrad Sangma ha ka sngi Thohdieng u la ong ba ka Sorkar Jylla ka la dep ban pynmih ïa ka jingpynbna paidbah na ka bynta ban pyntreikam noh ïa ki aiñ kiba ïadei bad ki kam sniew bad ki kam bymman ki ban treikam naduh ka 1 tarik u Naitung 2024.
Haba pyntip ïa kane u Myntri Rangbah u Conrad K Sangma ula ong, “Ka sorkar Meghalaya ka la dep pynmih ïa ka jingpynbna paidbah ban pyntreikam noh ïa kitei ki aiñ kiba thymmai kiba ïadei bad ki kam sniew bad kam bymman.”
U la ong, ba kitei ki aiñ kiba thymmai kin ym ktah eiei ïa ki kam bishar jong ki ïingkashari ne Court jong ki District Council.
“Em ngin pyntreikam hynrei ki aiñ kiba la don lypa jong ki District Council kin ym shah ktah. Ki aiñ bad ki kanun jong ki District Council kin ïai bteng ban treikam bad ka bor ka jong ki ruh kan neh kumba ka ju long, u pud u sam jong ki ruh un neh kumba long, kumta kam don kano kano ka jingkylli ba kan don ka jingktah ïa ki aiñ bad ïa ka bor jong ka kam bishar jong ki District Council.”
