Shillong, Jylliew 24: Ka ophis Deputy Commissioner (Supply), East Khasi Hills District la ïathuh sha ki paidbah ba la pyllait ïa u khaw hapoh ka NFSA (AAY and PHH) bad Non-NFSA bad Wholemeal Atta na ka bynta u bnai Jylliew 2024 bad la sam ruh sha ki dukan rashon ne Fair Price Shop.
Ïa u khaw u ba hab hapoh ka bhah AAY yn sam ha ka jingbun kaba 35 kg shi card bad uba ha ka bhah PHH ha ka jingbun kaba 5 kg shi khlieh briew kaba ym donkam ban siew pisa. Ka bhah khaw kaba hab hapoh ka Non-NFSA yn sam ha ka jingbun kaba 7.105 kg shi ïing ha ka dor kaba T. 12.70/- haduh ka T. 13.00/- ki shi kilo.
Katba ïa u Wholemeal atta yn sam ha ka jingbun kaba 5 kg shi card ha ki jaka sor bad 3 kg shi card ha ki thaiñ nongkyndong ha ka dor kaba T. 10.50/- shi kilo.
Lada ka don kano kano ka jingbym sam, ka jingsam duna jingthew, ka jingshim tam ka pisa ne ka jingsam da u khaw uba sniew ki paidbah ki lah ban ujor sha ka ophis Deputy Commissioner (Supply), East Khasi Hills District, Shillong.
