Shillong, Jylliew, 22: Ka Dorbar Shnong Mawryngkneng ha ka sngi Thohdieng ka la aiti da ka jingthoh ha u District Veterinary Officer ka East Khasi Hills da kaba tyrwa ban ai skhim jingïarap shwa ïa ki nongri jingri kiba la tbit ha ka kam ri jingri ha ka shnong Mawryngkneng.
Ha ka jingïakren bad ki lad pathai khubor u Sordar jong ka shnong Mawryngkneng Bah Peter Lawai u la ïathuh ba ka jingkyrpad ïa u District Veterinary Officer ka long ban pynbiang ïa ki dawai dashin ha ka Veterinary Dispensary ha Mawryngkneng khnang ban pynsuk ïa ki nongri jingri bad ïathuh ruh ba ki don ki nongri jingri kiba ladep ïoh jinghikai pyntbit kiba lah ban ïada ïa ki jingri jingdub bad ban sumar haba wan lynshop ki khlam jingpang bapher bapher.
“Ka jingbym don ki dawai bad ki drip na ka bynta ki sniang, ki syiar, ki masi ka la pynduh mynsiem ïa ki nongri jingri,” u la ong.
U la ïathuh ruh ba ka jingkyrpad ka long ban kham pynbun ïa ki nongtrei ha Veterinary Dispensary naduh ki Staff bad ki VFA ba kin dup lah ban ai ka jingshakri kaba kham bha ïa ki nongri jingri.
Ka Dorbar Shnong Mawryngkneng ka la kyrpad ïa u DVO ban pynïoh ïa ka Training Hall kaba pura hapoh ka Veterinary Dispensary Office khnang ban dup ai jinghikai bad jingpynshai sha ki nongri jingri ban sngewthuh kham bha ïa ka kam ri jingri.
U la ïathuh ruh ba ka jingkyrpad ka long ban buh ïa ka Boar Semen Collection Centre bad ka Demonstration Farm
U la ong ruh haba wan ki jingmyntoi na ka sorkar, dei ban ai nyngkong shwa sha ki nongri jingri kiba la sdang la kham slem ïa ka kam ri jingri bad kiba la don ïa ki syrnot ba la pyndep ïa ka jingshah hikai pyntbit bad kiba don ruh ïa ka mon ban ri jingri bad ka jingpynshisha na u Veterinary Officer shwa ban ïoh ïa ka skhim ri jingri.
Kawei na ki mat kaba kham kongsan, ka dei ka jingpynïaid iew ïa ki jingri. Ka Dorbar Shnong ka la kyrpad ïa u DVO ban wanrah noh da ka Marketing Cell ha ka jaka jong ka Pig and Poultry Farm khnang ba kan long ka jingmyntoi hi ïa ki paidbah ha ka ïohkam ïohjam da kaba die ïa ki pylleng bad ka doh sniang.
