New Delhi, Jylliew, 22: Khnang ban pynthikna ïa ka jingshai bad ka jingïaid ryntih ka jingpynlong ïa ki eksamin lyngba ka National Testing Agency (NTA), ka tnat Higher Education, hapoh ka Ministry of Education ka la thung ïa ka High-Level Committee jong ki riewshemphang ki ban ai jingmut halor ka jingpynkylla ha ka rukom treikam ban pynlong ïa ki eksamin, ka jingkyntiew ïa ki Data Security protocol, ka jinglong bad ka rukom treikam jong ka National Testing Agency (NTA).
Ïa ka High Level Committee la khlieh da u Dr. K. Radhakrishnan kum u Chairman uba dei ruh u Chairman barim jong ka ISRO bad Chairman ka BoG, IIT Kanpur.
Ki dkhot ki kynthup ïa u Dr. Randeep Guleria uba dei Director barim jong ka AIIMS Delhi, u Prof. B J Rao uba dei u Vice Chancellor jong ka Central University of Hyderabad, u Prof. Ramamurthy K uba dei u Professor ba la shongthait ka tnat Civil Engineering, IIT Madras, u Pankaj Bansal u nongsenglang jong ka People Strong bad dkhot ka Board – Karmayogi Bharat, u Prof. Aditya Mittal uba dei u Dean Student Affairs ka IIT Delhi bad u Govind Jaiswal uba dei u Joint Secretary jong ka tnat Pule Puthi ka Sorkar India kum u Member Secretary.
Ki kam ba kane ka komiti ka peit ki long halor ka jingpynkylla ha ka rukom treikam ban pynlong eksamin, ban peit pura ïa ka rukom pynlong eksamin bad ban ai jingmut kumno ban kham pynseisoh bad pynïaid ryntih ïa ka kam bad ban tehlakam ïa kano kano ka jingbakla, ban peit bniah ïa ki Standard Operating Procedure (SOP)/Protocol jong ka NTA bad ai jingmut kumno ban pynkhlain ïa kine ki mat /protocol ha ryngkat ka rukom peit ïa ki kam ban pynthikna ïa ka jingbud ïa ki kyndon ha baroh ki kyrdan.
Ban peit ïa ka jingkyntiew ïa ki Data Security protocol, ban peit ïa ki kam Data Security ba la don lypa bad ki Protocol jong ka NTA bad ai jingmut kumno ban kyntiew shuh shuh ïa kine, ban peit ïa ki Security Protocol ba la don lypa ha kaba ïadei bad ka jingbuh ïa ki jingkylli bad kiwei kiwei ki kam na ka bynta ki eksam bapher bapher bad ban ai jingmut kumno ban pynkhlain shuh shuh ïa ka kam, ban peit ïa ka jinglong bad rukom treikam ka National Testing Agency, ban ai jingmut shaphang ka jinglong bad ka rukom treikam ka National Testing Agency (NTA) ban pyntreikam ïa ki jingai jingmut ba ai ha ka thup (i) bad (ii) bad ban batai shai ïa ki kam ki jam bad ki jingbahkhlieh jong ki nongtrei ha baroh ki kyrdan bad ban peit ïa ka rynsan ai jingujor jong ka NTA ba don mynta, wad ïa ki bynta ba lah ban kham pynbha bad ai jingmut kumno ban kham pynseisoh ïa ki kam.
Kane ka Komiti kan ai ïa ka kaiphod jong ka sha ka tnat hapoh ar bnai hadien ba la pynmih ïa kane ka jingpynbna bad ka Komiti ka lah ban shim ïa ka jingïarap jong ki riewshemphang ha ki kam bapher bapher ban ïarap ha kane ka kam.
