Pynjulor ka mariang ïa ka ïing ha Manad, rong ka um ïa ka surok Wahrngi sha Langwarai

Mawkyrwat, Jylliew 19: Ka jingther jong u lapbah uba jur uba la neh naduh ka 15 tarik haduh ka 18 tarik mynta ubnai ka la pynlong ïa ka khyndew ba kan shong synjor bad wanrah ruh ka jingtwa khyndew ha kiba bun jaka bad shah ktah ruh bun tylli ki longïing.
Ka khubor ba la ïoh na u District Disaster Management Officer, South West Khasi Hills District Dr. E.S. Langshiang ba ha ka ejahar ba la ujor ha ka sngi Balang la pyntip ba kawei ka ïing ha ka shnong Madan ka la shah tap ha ka khyndew bad kane ka la jia ha ka por 6:30 baje mynstep.
Kawei pat ka surok kaba dei ïaid na Wahrngi sha Langwarai ka la shah rong noh ha ka um bad kumjuh ruh ka lynti ïaid kjat ha Pdengshnong Presbyterian Church.
Ha kawei pat ka khubor, ka Hynñiewtrep Youths Council (HYC) Umdohlun CircleCircl, lyngba u General Secretary Willibert S Paliar, ka pynpaw ka jingsngewbynñiaw halor ka jingsyrtok ha ka leit ka wan jong ki paidbah naduh na ka thaiñ Mariem, Umdohlun, Wahkaji, Warsanlyngdoh bad kumjuh ruh na ka thaiñ Phlangdiloiñ namar ka jingtwa khyndew ba khah khah bad kumjuh ruh ka jingtwa ki Sub-way ha ki thaiñ Rangblang kaba la jia la ar lyiur mynta.
Kane ka la ktah shibun ïa ka leit ka wan ki paidbah ka thaiñ khamtam eh ïa ki bapang ki bashitom kiba hap ban sahkut ha shiteng lynti kumjuh ïa kiba leit donkam ha Nongstoiñ bad Mawkyrwat bad ruh ka shem jingeh ïa ki khynnah skul kiba dang don hapdeng ka eksamin ban poi ha ki por ba biang.
Kum ban shu kdew hangne ba ka jingpyntrei ïa kane ka projek surok ka la long kaba suki haduh katta katta kaba la ktah shibun eh ïa ka leit ka wan u paidbah.
Ka seng ka kyntu ïa ki bor bahalor ba kin tuklar lem da kaba kyntu ïa ka kompeni ba pyntrei ïa ka surok ba kin kham pynstet bad ba kin pynbiang mardor ha ki jaka ba don jingkieng khnang ba ka leit ka wan ki paidbah kan bit kan biang.