Ba wanrah masi sha Malangkona shah khanglad ha ki Pulit Assam bad RBSU

Nongstoiñ, Jymmang 24: Ka jingleh don bor jong ki pulit Assam ha ki thaiñ Malangkona naduh ba ki ar sorkar ki la dep ïasoi ïa ka soskular pynbeit pud, ka la sdang paw pyrthei naduh u bnai ba la dep bad ka la bteng haduh ka lah sngi u Blei ka 23 tarik mynta u bnai, ha kaba ki ar ngut shikpa shi khun kiba la tip kyrteng kum u Solen Sangma 60 snem ka karta bad u Rambel Marak 30 snem ka karta, u ba dei u khun jong u na ka shnong Huhuapara, kata katba ki dang wan ïalam ïa ki masi ba ki leit thied na Dhupdhara na ka bynta ban pynlur pynthor kba.
Katkum ki tyllong khubor ba la ïoh na katei ka thaiñ, la ong ba katba kitei ki ar ngut ki dang wan ïalam ïa kitei ki masi lur bad haba la poi ha ïew Joypur (Gamarimura), ki dkhot jong ka Rabha Student Union ki ryngkat ki pulit Assam ki la wan ban khnang lynti bad bat noh ïa kitei ki masi. Nalor kata la ong ruh ba hadien ba ki la bat ïa ki masi, ki paitbah ki la sdang ban ïa mih bad ka la poi ha ka jingïania kaba jur bad ïa syndong kti ruh. Hynrei ki pulit Assam ki la tan jubor ïa kitei ki ar ngut shi kpa shi khun bad ki la thep hapoh kali bad kit bak sha Boko, na ka bynta ban pynlong ïa ka jingtohkit bad haduh mynta kitei ki ar ngut ki dang don ha ka kti ki pulit Assam ha Boko.
Ha katei ka juh ka sngi la ong ba ki pulit Assam, ki la hiar sha Malang Salbari ha ka jaka ba ki nongshong shnong ki dang sdang ban shna ïa kawei ka ïingshet ja kaba dei ruh ka jaka buh tiar jong ka skul, ha kaba ki pulit Assam ki la pynsangeh jubor. La ong ba ha katei ka por ki paitbah ki la ïamih puk bad ka la mih ka jingïania kaba jur, ha kaba ki paitbah ba kynthup naduh ki longkmie bad ki rangbah, ki la shah bom da ki lathi ha ki pulit Assam.
Nalor kata kawei pat ka jingjia ha katei ka thaiñ, ka dei ha ka shnong Garojan kaba hap ha ka Tarabari sector, ha kaba u Lasping Marak, ka Asha Marak bad ka Nebula Marak kiba dei na kawei ka longïing, ki dei kiba kwah ban pynïasoh bad ka Assam. Katba ka khun jong ki bad u pyrsa pat ka kwah ban don ha Meghalaya, kumta ka la mih ka jingïapher jingmut kaba jur hapdeng jong ki, ha kaba kitei ki lai ngut ki la ujor da ka ejahar sha ki pulit Assam.
Ki pulit Assam ki la wan ban kem ïa ki bad ha ka por ba ki pulit Assam ki wan, ki paitbah ki la mih puk bad ka poi haduh u pud jong ka jingïashoh ïadat kaba jur ha kaba ki la don ki rangbah kiba la shah bom lathi ha ki pulit Assam haduh ba ki met ki phad ki la jngem snam bad ki la shitom jur.
Kum ban pynkynmaw ba katei ka shnong Garojan ka dei kawei na ki shnong kiba katkum ka map kaba la pynmih da ka sorkar jylla ha u snem 2011, ha ka por ba u Dr Mukul Sangma u long kum u Myntri Rangbah, katei ka shnong kam shym la shah kynthup shuh ha Meghalaya, hynrei ka la hap ha Assam.
Kaba lyngngoh pat ka long ba kiwei pat ki shnong kum ka Salbari, Huhuwapara, Siminaguri, Joypur bad Amagaon katkum ka soskular ba la dep ïasoi, ki la shah khynñiat sha Assam bad dei na halor katei ka nongrim, ba ki pulit Assam ki la sdang ban pyni bor khyndiat sngi hadien ba la dep ïa soi ïa ka soskular da kaba khang shisyndon ban khat shyiap na ka wan ka ba tuid na kitei ki shnong.
Halor ka jingmih jong ki kynrum kynram bad ka jingshah thombor jong ki paitbah nongshong shnong ha ki pulit Assam, la sngewthuh ba lada ka sorkar kam lah ban tem ha ka por kaba biang ka lah ban poi wat haduh ka jingïaum snam hadien habud.