Shillong, Jylliew 17: Ka BJP Garo Hills ka la plie ïa ka ‘Arigri.com’ ha ka jingïadonlang u State BJP President u Rikman G Momin.
Kane ka website / app kan khmih ïa ki jingpyntrei ïa ki skhim jong ka sorkar pdeng ha ka jylla lyngba ka jingïashim bynta naduh ki paidbah kiba dei ki nongïoh myntoi bad ki nongshong shnong, u BJP vice president bad u MDC ka Tura u Bernard N Marak.
Ka BJP ka la ong ba bun na ki skhim dei ban khmih bniah bad ban ai ka kaiphod sha ki tnat khnang ba kin ïoh ïa ki utilisation certificate.
Ka la ong ba bun na ki skhm ki la kylla long ki kam bam sap ha kiba bun ki shnong kiba ka BJP kam lah ïapeiñ. Ka Arigri kaba mut ka “No boundaries” bad “unlimited” ha Garo ka thmu ban trei ïa ka jingkiew kiba duk khlem da kheiñ la kidei na kano kano ka party.
U la ong ba ka Arigri kan don ïa ka full time office bad kan shakri kum ka grievance cell na ka bynta kiba ïoh myntoi kiba la shah ktah. Kin don artylli ki level team ki ban trei ha ka Arigri. Kawei kadei ka Center Scheme Monitoring Committee (CSMC) bad kawei kadei ka Grassroot Review Organisation (GRO) ha kaba ha ka Garo ka mut ki skhim ne pisa.
Ka sorkar pdeng ka la aiti sha ki nongthep vote ban ai ki lad kiba bha tam kaba ki politician ki la kular ha ki por election hynrei ha ka jingshisha ki skhim jong ka sorkar kim ju poi.
“Namar kata kane ka app kan ai ka rynsan ban pynïaid shakhmat ïa ki kular ba la ai da ki nongïalam jong ki da kaba pynpaw ïa ki jingdonkam bad ki jingkhmih lynti ki nongthep vote. Ka GRO kan pynlong ïa ki samla ban register ïa ki kyrteng jong ki ha ki flagship programme bapher bapher kiba la synniang da ka Sorkar Pdeng,” ong u Marak.
Ka Arigri team kan ïarap ïa ki samla ban ïoh ïa ki thong ki jingkyrshan bad ban ïarap ïa ki samla ban apply bad ban ïoh ïa ki skhim na kiba bun ki tnat sorkar.
Ka CSMC ha kawei ka liang kan khmih ïa ka jingpyntrei ïa ki skhim kum ka PMAY, JJM, PM KISAN, PMGKAY, MHIS, PMGSY, NREGA, IHHL bad kiwei ba kynthup ha ki Primary School bad ki Health Center kiba donkam ïa ki jingpynthymmai kiba kyrkieh ha ka jylla, u la ong da kaba bynrap ba kane Arigri kaba la plie ha Garo shen kan don ha ka ktien English version bad kumjuh ha ka Khasi bad Jaiñtia.
