ïaroh u Myntri Sorkar Pdeng ïa ka ‘ED Devpt Mission’ bad ka ‘Entrepreneurship Ecosystem’ ha ka Jylla

Shillong, Jymmang :Ha ka jingïalang ba la khot pynlong da u Myntri ka tnad Education, Skill Development and Entrepreneurship ka Sorkar Pdeng, u Dharmendra Pradhan ha ka 21 tarik mynta u bnai hapoh ka skulbah NEHU la ïa don ryngkat u Myntri Rangbah ka jylla, u Conrad Sangma, u Myntri ka tnat Pule Puthi, bah Lahkmen Rymbui bad kiwei pat.
Ki mat bala ïatai ha kane ka jingïalang ki long ban sngewthuh ïa ka jinglong ka jaka bad ban thew ïa ka jingïaid shaphrang ka Sorkar Meghalaya ha ka jingheh jingsan ki khunlung, ka rukom hikai, ka jingsengkam lajong bad ka lad ïohkam ïohjam.
La pyni ruh ïa ka jingbatai ba bniah ka ba pynpaw ïa ka jingïaid shaphrang jong ki kam pynroi bapher bapher, ki jingeh ba ka sorkar ka ïakynduh bad ki jingjop jong ka. Katto katne ki symboh ba la pyni ki kynthup ïa ka jingïaid ki kam hapoh ka ‘Early Childhood Mission,’ ki jingpynbha ban ïoh pule kham shalor, ki jinghikai pyntbit, ka jingsengkam lajong bad ki program jong ka PRIME.
Na ka liang u Myntri Rangbah ka jylla u Conrad Sangma u la pyntip sha u Myntri ka Sorkar Pdeng halor ka program ba dang shu plie paidbah dang shen ka ‘Meghalayan Grassroots Music Projects’ bad kiwei kiwei ki program ba la leh ban kyntiew ïa ki nong thaiñ bad nongshnakti ha ka jylla.
U kongsan u la ai jingmut ruh ïa ka Jylla ban kynthup lang ïa ka ‘Early Childhood Mission’ ban ïasnoh lang bad ka tnad ka pule puthi bad ka tnad Social Welfare. Shuh shuh, u la ai mynsiem ruh ïa ki samla ka Jylla ba kin shah hikai halor ki kam ki ba ïadei bad ka jingpynrung kyrteng ban khanglad ïa kiwei ban die ïa ki jingshem ne jinglap jong ki bad ka la bthah ruh ïa ka skulbah NEHU ban bad pynmih ïa ki jingpule halor ka jinghikai pyntbit bad ki jingkhanglad ïa kiwei ban die ïa ki jingshem ne jinglap jong ki.
Nalor kata u la ai jingmut ruh ba yn jied ïa ka NEHU ba kan long kum ka bor ban khmih ïa baroh ki jaka pule ka Sorkar Pdeng ha ka jylla. U la ai jingmut ruh ba ki skulbah ha ka jylla ki dei ban sdang noh ïa ka ‘National Institute Ranking Framework (NIRF).’ Nalor kata, u la ai mynsiem ïa ki khynnah pule ha ka jylla ba kin pyrshang ban rep ban riang ha ïing ha sem bad ha skul ruh.