Shillong, Jymmang 24: Ka Mawlai SC bad ka Laitkor SC ki la rung sha ka final jong ka lympung ïalehkai football ki kynthei kaba la tip kum ka Women Football League 2021-22 ba pynïaid da ka Shillong Sports Association (SSA). Kine ki ar tylli ki team kin ïaknieh ïa ka nam lahduh ha ka 27 tarik Jymmang 2022 kaba dei ka final ha ka por 4:00 baje janmiet ha madan MFA, Tird Ground, Polo, Shillong.
Ka Mawlai SC ka la rung final da kaba pynliem da 3-1 kol pyrshah ïa ka Maw-U-Tieng ha ka jingïakhun semi-final kaba nyngkong ha ka sngi Ba ar, katba ka Laitkor SC ka la pynliem da 2-0 ïa ka Lawei SC ha ka jingïakhun semi-final kaba ar ha katei hi kajuh ka madan ïalehkai.
Haba phai sha ka jingïakhun hapdeng ka Mawlai SC bad Maw-U-Tieng ka jingïakhun ka long kaba ïakhaid bad biang bor bha, baroh ar ki kynhun ki la pyrshang thep kol ha kaba sdang ka jingïalehkai. Hynrei dei ka Mawlai SC kaba la plie pyrda nyngkong ïa ka shi kol kaba la wan lyngba ka Ibashisha Khongwet kaba la pynkhih jar ha ka minit ba 15.
Ka jingïalehkai ka la nang itynnad da kane ka shi kol bad ka Sidaris Khongwet ka la pynskhem ïa ka kynhun da kaba thep ïa ka kol kaba ar ha ka minit ba 24. Watla ka la shah thep ar kol, hynrei ki thei ka Maw-U-Tieng ki la ïakhun tyngeh ban pynphai kylla ïa kitei ki ar kol. Bad da ka jingïapashat bol bad pyllait bol bha, ka Lavinia Warjir ka la ïoh ban pynhiar mynsiem ïa ka kynhun da kaba thep ïa ka shi kol ha ka minit ba 29.
Ka jingïakhun ka la nang thnem ba baroh arliang khlem da ailad ïa ki jingthep kol bad kyrda tyngeh beit ha kaba ka jingïakhun jong ka kylla step ka la kut da 2-1 ïa kaba la lamkhmat da ka Mawlai SC. Ha ka kylla miet mar ïa sdang ka jingïalehkai, ki thei jong ka Maw-U-Tieng ki la ïakhun tyngeh bad tur beit sha ka kut jong ka Mawlai da ka thong ban pynphai shuh sa ïa ka shi kol.
Hynrei na ka jingskhem ki thei ïalehkai dien bad na ka jingtbit ka thei ap kol ka Mawlai, ki khlem lah ban ksam lyngba. Katba ki minit ki dang ïaid ka jingïakhun ka la nang itynnad baroh ar kynhun ki la trei shitom bad pashat bol ha ka rukom kaba itynnad bad pynshohbiej ïa ki paidbah nongpeitkai.
Dei ha ka minit kaba 53 ka la pynshaïong ngaiñ ïa ki thei ïalehkai ka Maw-U-Tieng ha kaba ka Rushia Dkhar ka la thep ïa ka kol kaba lai bad kaba khatduh na bynta ka Mawlai SC. Lyngba kine ki lai kol ka la nang pynskhem shuh shuh ïa ka kynhun kaba khlem ailad satia ïa ki thei ka Maw-U-Tieng ban pynphai ïa kitei ki ar kol.
Bad haduh kaba kut ki minit ïalehkai, ka Mawlai SC ka la pynliem noh da 3-1 bad rung syndon sha ka final.
Ha ka semi-final kaba ar hapdeng ka Lawei SC bad Laitkor SC, ka jingïakhun hapdeng kine ki ar tylli ki team ruh ka long kaba ïakhaid bha. Naduh kaba sdang ka jingïakhun baroh ar tylli ki kynhun ki la ïoh ban pynsmiej mar kylliang ha ka thep kol.
Ka jingïakhun ka la nang ïaid, ki jingïapyrshang thep kol ruh ki la sepei, hynrei dei ha ka minit ba 21 ka Ribahunshisha Kharshiing ka la ïoh ban pynkhih jar nyngkong na bynta ka Laitkor SC. Lyngba kane ka shi kol ka Laitkor SC ka la nang ïoh mynsiem bad ïoh bat bha ïa ka bol da kaba tur beit sha ka kut da ka thong ban thep kol khnang ban pynthikna ïa ka kynhun ban rung sha ka final.
Hapdeng ka jingïalehkai kaba jur bha ha kaban pyrshang thep kol, ka Solina Jaba ka la ïoh ban khyrwit ïa ka shi kol kaba itynnad bha ha ka minit ba 39 bad haduh kaba kut ka kylla step ka Mawlai ka la lamkhmat da 2-0. Ha ka kylla miet ka jingïalehkai ka la kut noh khlem da don ba ïoh thep kol ha kaba ka Mawlai ka la jop syndon tang da ki ar kol ba la thep ha ka kylla step.
