SSA Super Cup: Pynliem noh ka MLP da 5-4 ïa ka Langsning

Shillong, Risaw 14: Ka Meghalaya Police ka la pynkyndit da kaba pynliem noh ïa ka Langsning da 5-4 lyngba ka penalty shootout ha ka jingïalehkai playoff kaba ar jong ka SSA Super Cup 2026 hynne ka sngi Balang ha SSA Stadium.
Ka Langsning ka la lamkhmat ïa ka kylla lyngba u Wadajied Kynsai Ryngkhlem (17′) hynrei u Rapborlang Marwein (67′) u la pynïakhaid ha ka kylla miet na ka bynta ka MLP bad ka jingïakhun ka la ïakhaid mar 1-1 kol haduh kaba kut jong ka 90 minit bad ruh ha ka 30 minit jong ka por pynjlan.
Ha ka jingïashut penalty, baroh arliang ki la lah ban thep ïa ki lai tylli ki jingpyrshang ba nyngkong. Hadien nangta, la sakhi ïa ar tylli ki jingpyrshang kiba la shu syrwa kai na u Chesterfield Nongdhar ka MLP bad u Donlad Diengdoh ka Langsning. Ha kaba kut, ka MLP ka la lah ban thep ïa baroh ar ki penalty ba dang sah katba ka Langsning ka la pynrung tang kawei, hadien ba ka jingpyrshang jong u Mangkara Sun ka la shah khanglad noh ha u rangap kol ka MLP, u Eveningstar Bareh.
Haduh mynta, baroh ar tylli ki jingïalehkai jong ka Super Cup ki la long kiba itynnad, ha kaba ka Nongkseh ka la hap ban ïakhun tyngeh hadien ba ka la shah tam da shi kol ban pynliem ïa ka Sawmer da 4-2 hynnin ka sngi Ba-ar.
Mynta ka MLP kan pynkhreh ban ïakhun pyrshah ïa ka Shillong Lajong ha ka semifinal kaba ar ha ka sngi Saitjaiñ. Ka Super Cup ka pynïasoh lang ïa ki kynhun ïalehkai kiba pyndep ha ka thup kyrdan Top 6 ha ka Shillong Premier League 2026 ban ïa tynjuhbor ha ka rukom ïakhun kaba tang shi wat ne Knockout. Ka Mawlai kaba dei ka lahduh bad ka Lajong kaba wan ba-ar ki la ïoh ban rung beit beit sha ka semi phainal.
Ka jingïakhun hynne ka sngi la sakhi ïa ka Langsning kaba la tehlakam ïa ka kylla step. Ka kol ba nyngkong ka la urlong hadien ba u Mebanshngain Kurkalang u la pyndei tiak da ka khlieh ïa ka bol ban phah sha u Wadajied, uba la pyrshang kham jam shapoh kol.
U Eveningstar, nongap kol ka MLP, u la iehnoh shadien ïa kaei kaba la jia ban sei ïa ka sap ba tbit da kaba khanglad ïa ki jingpyrshang jong u Samuel L Kynshi bad na u Mebanshngain.
Haba jam sha ka kylla miet, ka MLP kaba la pynliem ïa ka Langsning da 2-1 ha ka SPL ha u bnai Nailar, ka la kham pynkhlaiñ ïa ka jingïalehkai jong ka, kaba ïaid ryngkat ka sur kaba jam naki paid nongkyrshan. Ynda la poi shi kynta tam, u nongthep kol ba bun tam jong ka ha ka SPL, u Everestarly Rynjah u la ïoh ïa ka lad ban pyrshang sha kol hynrei u nongapkol ka Langsning u Rajat Paul Lyngdoh u la ïoh ban bat ïa ka bol. Tang khyndiat por hadien kane, u Rapborlang u la ïoh ïa ka lad ban pynïakhaid.
Shuwa ba ka jingïakhun kan jam sha ka por pynjlan, ka Langsning ka la ïoh ban pynkhihjar lyngba u Mecheal Roy Kurbah hynrei u assistant referee u la dep rah lypa ïa ka lama namar ka offside.
Ki ar tylli ki jingïakhun semi final kin long ha ka sngi Thohdieng bad sngi Saitjaiñ. Ka Mawlai kan aireng pyrshah ïa ka Nongkseh ha ka jingïalehkai ba nyngkong, bud sa ka Lajong pyrshah ïa ka MLP ha ka sngi ba bud.
Baroh ar tylli ki jingïalehkai kin sdang ha ka por 5 baje janmiet ha SSA Stadium.