Sdang lap ksai ki Pulit ïa ki briew kiba pynïap ïa ki bar jylla ha Ichamati
![](https://mawphor.com/wp-content/uploads/2024/03/ichamati.jpg)
Shillong, Lber, 29: Ki Pulit jong ka East Khasi Hills District kiba la pynlong ïa ka jingtohkit kaba bniah ki la sdang ban lap ksai ïa ki briew kiba donkti ban pynïap ïa ki arngut ki bar jylla ha ka shnong Ichamati, kaba hap hapoh ka Sohra Civil Sub-division, East Khasi Hills District.
“Ngi la ïoh ksai halor ki katto katne ki briew kiba ngi suba ba ki dei kiba donkti ha ka kam bymman ha ka shnong Ichamati. Hynrei, haduh mynta ngim pat kem satia ïano ïano ruh. Ngi dang pynlong ïa ka jingtohkit kaba bniah ha lyndet ka jingthmu jong kane ka kam bymman,” ong u Superintendent of Police ka East Khasi Hills District u Rituraj Ravi ha u kyrwoh ba la phah sha ki lad pathai khubor ha ka sngi Palei.
“Ngi kyntu ïa ki paidbah ba kin pynneh ïa ka shongsuk shongsaiñ bad ban burom ïa ki kyndon jong ka aiñ,” la ong u SP.
Kum ban shu pynkynmaw hangne, ar tylli ki metïap jong bar jylla la lap ha ka janmiet sngi Ba lang ha ka shnong Ichamati bad Dalda kaba hap hapoh ka Shella Police Station, East Khasi Hills District. Kine kiba la shah pynïap ki long u Esan Sing bad u Sujit Dutta bad ïa ka met ïap jong kine ki arngut la lap na ka shnong Ichamati bad Dalda.
Kane ka la jia ryngkat, ha kane ka sngi ba ka Khasi Students Union (KSU) ka la pynlong ïa ka jingïalang ha ka por mynsngi ban pyrshah ïa ka Citizenship (Amendment) Rule, 2024.
La suba ba ki runar ki la shim kabu ha kane kajuh ka sngi ban dkhat jubor ka jingim jong ki arngut ki bar jylla.
Ïa ka met jong kine ki arngut la leh ïa ka post mortem ha Shillong Civil Hospital ha ka sngi Palei.
Ki ar ngut ki para jong ki ar ngut ki bar jylla kiba la shah pynïap ha Ichamati ha ka jingïakren bad ki lad pathai khubor ha ka sngi Palei katba ki dang ap ïa ka jingleh Post Mortem ha Civil Hospital, Shillong ki la ïathuh ba ki la ïoh jingtip ïa ka jingïaklumar ha iew Ichamati kaba la sdang ha ka por kumba 4:00 baje nohphai sngi hynrei ki la ïoh jingtip ïa ka jingkhlad kine ki arngut ka dei ha ka por premmiet.
Uwei na ki para jong uba la shah pynïap u la ïathuh ba u hymmen jong u, u dei uba ju bylla thep maw bad katba u dang thmu ban wan phai sha la ing bad ha shi teng lynti u la ngat pynban ha ka tyrsim jong ki runar kiba la tangon ïa u haduh ba un da ïap bad ïa ka met jong u la lap narud surok.
Halor kane ka jingjia, ki Pulit ka Sohra bad Shella bad kynthup ruh ki Pulit na Shillong ki la hiar sha ka shnong Ichamati, ka shnong kaba don ha khappud bad ka ri Bangladesh ban pynkhlaiñ ïa ka jingpahara bad ban pynneh ïa ka shongsuk shongsaiñ.
Kumba ka long mynta, ka jinglong jingman ha ka shnong Ichamati ka la pynsyier mynsiem ïa ki nongshong shnong khamtam ïa ki bar jylla.