Mendipathar, Lber 29 : U National President ka NPP bad Myntri Rangbah ka Jylla Conrad K Sangma, ula pynbna ba ka Agatha K Sangma ka MP Lok Sabha na Tura kum ka Nonglamktien ne ‘Ambassador” ka Jylla Meghalaya’ sha Parliament ban tynruh bad ïasaid ïa ki mat kiba ïadei bad ka roi ka par bad ka jingkiew shaphrang jong ka Jylla.
Haba ïalap elekshon ha ka ktem ka NPP ha North Garo Hills, u Myntri Rangbah ula ong “Baroh ki Jylla ki ju phah ïa ki jing tyrwa sha Delhi, kumjuh ruh, ka Meghalaya ka ju leh lang, hynrei kine ki jingtyrwa ki donkam ïa ka ban buddien, bad ka MP jong ngi ka Agatha K Sangma ka ju bunkam ban ïakren bad ki nongïalam ha Delhi ban pynthikna ba ngin ïoh bun eh ka bhah. Kum ka Nonglamktien ka Meghalaya, ka la ïakren ïa ki jingtyrwa jong ngi (Meghalaya) bad u Myntri Rangbah Duh, ki Myntri Sorkar bad ki Heh Ophisar ha Delhi, ban pynthika ba kin lait noh”.
U Conrad ula ai ka jingïaroh ïa ka Agatha halor ka jingpyllait ïa ki project ba kot da ki hajar klur ïa ka Meghalaya hapoh ka PM-DevINE, PMGSY, PMAY, MGNREGS, bad kiwei kiwei, kiba la syniang sha ki jingkylla kiba paw hapoh ka Jylla.
“Ka long kaba kongsan ba ngi jied ïa ki MP, kiba lah ban treikam ha ryngkat bad ka Sorkar Jylla. Ka long kongsan ruh ba ngi don ïa ka MP, kaba don ka jingïadei bad ïajan ha Delhi. Ka MP ba mynta jong ngi ka dei kaba la shemphang bad ka la trei la lai samoi bad nga kyrpad ïa ki nongthep vote ba kin ai rai biang sha ka khnang ba kan lah ban bteng ha ka ban trei bad ka Jylla ban pyntyllun shaid shaid ïa ka roi ka par.
