Jowai, Lber 27: U Prof. Lakhon Kma, u kyrtong shimet ban ïa aireng sha ka Lok Sabha Election 2024 na ka Shillong seat, mynta ka sngi Palei 28 tarik u Lber uba wan hiar ha Jowai bad ha Phramer West Jaiñtia Hills District ban pynsngew ïa ki mat treikam jong u kiba un leh lada un wan ha jingjop don burom.
Utei u kyrtong shimet ula don ïa ka Motto kaba ong “Ban Trei sha ka Jingïasanlang Ka Meghalaya” ha kaba ula don shibun ki mat treikam ne ki Mission kaba kynthup naduh ka pule ka puthi ha ki kyrdan bapher bapher, ka koit ka khiah, ki lad ïohkam ïoh jam, ban pynbeit ïa ka jingïa khajia khappud kaba la sah teng la 52 snem mynta, nalor kiwei kiwei de ki mat.
U la buh hakhamt khamtam ïa ka lad ïoh kam ïoh jam jong ki trai ri trai mukul kata ban wanrah ïa ki karkhana shapoh ka jylla khlem da don kano kano ka jingktah ïa ka mariang kum ki Pharmaceuticals, Food processing, ai dawai kynbat bad kiwei de.
U la pynsngew ba ka sorkar ka la dei ban ithuh noh ïa ka ktien Khasi hapoh ka khyrnit kaba phra jong ka Constitution, bad ula ong kum u kyrtong jong u paidbah u kwah ban don ka jingtrei kaba khuid bad kaba suba khlem ka jingshah shilliang la ha ki jaka sor bad ha ki jaka nongkyndong.
Ha ka jingïalang ha Jowai la pynlong ha Stad Ummulong Iawmusiang katba ha Phramer ha ka por janmiet ula pynlong ha madan ïalehkai phutbol jong ka shnong.
Na ka liang u Prof. Lakhon Kma kum u kyrtong ba thymmai ual pynsngew ka jingmih madan ban ïakhun ïa kane ka Election mynta ka kynti ka dei lyngba ka jingpasiaw ha u namar ka jingtlod palat ka rukom treikam mynta jong ki nongmihkhmat jong ki kynhun seng siañ hima sima bad kim long shuh kiba ïadei dur na ka bynta u paidbah.
Kumta u khot ïa ki paidbah ba kin pynjop don burom ïa u ha kane ka kynti, da kaba un trei shitom na ka bynta ki Hynñiew (7) tylli ki District jong ka jylla, kum u briew uba la ïaid kylleng sawdong ka pyrthei lyngba ki ri bapher bapher bad kum u nonghikai skul bah (NEHU) u thrang eh ban ai ka jingshakri kaba bha tam, kata “ban kynkiew ka jylla ha baroh ki liang kumba long kiwei ki jylla ba paw hapoh ka Ri India” da kaba ïasaid hapoh ka dorbar Parliament.
Ha kaba ïadei bad ki rukom treikam jong u Prof. Lakhon Kma na ka bynta ka jingtip ki paidbah ula buh ruh ïa ka Website: www.lakhonkma.com bad ka YouTube Channel: @lakhonkma.
