Ha ki 6 snem ka NPP ka la wanrah ïa ka roi ka par hapohka jylla : Agatha
Thep kyrteng ka Agatha bad u Saleng na ka Tura Parliamentary Constituency
Shillong, Rymphang 26 : Mynta ka sngi ka Agatha Sangma bad u Saleng Sangma ki la leit ban thep kyrteng na ka bynta ban ïa khun ïa kane ka election MP Lok Sabha 2024 ka ban long ha ka 19 tarik Iaiong.
Ka Agatha kaba dei ruh ka MP jongka NPP ka la leit ban thep kyrteng hapoh ka jingsynran lang u hymmen jongka uba dei ruh u Myntri Rangbah ka jylla bad u Natinal President ka NPP u Conrad K Sangma, U President ka NPP ha kane ka jylla bad Myntri ka tnad kam pohïing ka jylla u bah Prestone Tynsong, kiwei kiwei ki myntri sorkar, u Symbud Lamphang ka jylla u Timothy D Shira, ka kmie, u hymmen u James P.K Sangma, bad ki paid nongkyrshan.
U Saleng pat uba thep kum u kyrtong ka Congress la ïohi ba la synran ïa u da ki nongïalam ka Congress ha ri lum Garo, kiba haïing hasem lem bad ki paid nongkyrshan.
Haba kren sha ki lad pathai khubor ka Agatha ka la ong “ Nga don ka jingkyrmen ban jop ïa ka election namar ki paidbah ki la ïohi ïa ka jingsynshar jongka NPP ha kine ki hynriew snem ba ka la wanrah ïa ka roi ka par hapoh ka jylla bad kumjuh ruh ïa ka jingshong suk shongsaiñ bad da kane hi nga sngewthikna ba ki paidbah kin ai ka jingkyrshan ba pura ïa nga namar ki paidbah ki ieit bad pdiang ïa ka NPP kum ka party jongki ”.