Dawa ka MPCC ban tohkit ia ka jing twa ka ‘Dome’ ka ïingdorbar Thaw Aiñ

Shillong, Jymmang 23: Ka Meghalaya Pradesh Congress Committee (MPCC) kala dawa ïa ka Sorkar Jylla ba ka dei ban thung mardor da ka jingtohkit halor ka jingtwa ka dome (tnum shynrong pylleng) jong ka Ïingdorbar Thaw Aiñ ba dang pyntrei thymmai jong ka Jylla ha Mawdiangdiang, New Shillong Township.
“Ka Sorkar Jylla ka dei ban thung da ka jingtohkit, kan bha shibun lada ka Central Agency kan pynlong ïa ka jing tohkit khnang ba baroh kiba don bynta ha ka project bad kiba don bynta ha ka jingtwa ki dei ban shah pynshitom” ong u Bah Pynshngaiñ N Syiem, Working President ka MPCC haba ïakren bad ki lad pathai khubor hynne ka sngi nyngkong.
Une u Nongïalam ka Congress ula ïathuh “Kat kum ki kyndon jong ka tender, kam shym la don satia ka kyndon ban aiwai pateng ha kaban pyntrei ïa ka project sha kiwei pat ki kompani, hynrei ka Uttar Pradesh Rajkiya Nirman Nigam Ltd kaba dei ka PSU jong ka Sorkar Uttar Pradesh kala aiwai pateng sha ka kompani Badri Rai & Company kaba na Assam”.
Kat kum ka jingong jong u, ka Badri Rai & Company ka dei ka kompani kaba la iashimbynta lang ha ka jingïathep tender ban pyntrei ïa ka Ïingdorbar Thaw Aiñ ba thymmai ka Jylla hynrei kane ka kompani kala shah kyntait namar ba kam don satia ïa ka jingtip ne jingshemphang (experience) ban tei ïa u dome jong kane ka Ïingdorbar.
“Kumno ka kompani kaba la shah kyntait ha ka jingïathep tender ka ïohlad ban pyntrei sub contract ïa kane ka project” ula buh jingkylli ïa ka Sorkar.
U Bah PN Syiem ula ong “Ngi tip ba ka IIT Roorkee na Guwahati ka dei kaba pynkhreh ïa ka Design. Ka dei ka IIT ba kynsai tam hapoh ka. Ban kynnoh ïa ka IIT Rookee halor kane ka jingjia ka dei ka bym sngew iahap satia”.
Une u Nongïalam ka Congress ula ïathuh ba kat kum ka tender, ka Sorkar kala ai pyntrei ïa kane ka project ha ka jingmang pisa ba kot T. 127 klur hynrei hadien kala kyntiew ïa ka mang pisa sha ka T. 181 klur bad kyntiew biang sha ka T. 214 klur.
“Ka Sorkar ka jied ïa ka kompani na Uttar Pradesh tang namar ba ka pan dor duna eh. Phi la kyntait ïa ki kompani kiba tbit na ka jingïathep tender hynrei mynta pat phi kyntiew ïa ka jingmang tyngka. Ka mut aiu kane”” ula ong haba pyntip “Na ki jingpynshai ka Tnad PWD (Building) ka song pisa ba kot haduh T. 170 klur la dep ban pyllait hynrei ngim lah ban sngewthuh ba kat kane ka mang tyngka la pynlut, ngi dang ïoh pat ïa ka jingtei kaba leh tangdep”.
“Ngi sngewsih jur ba u Speaker ka Lok Sabha ula wan sha Shillong bad leit jngoh ïa kane ka project ha kaba ula mynjur ruh ban ai pisa ba kot haduh T. 100 klur hynrei kane ka song pisa kala shu long tang kum ka jingpynsyrwa kai” ula bynrap.
U Bah Pynshngaiñ ula ong “Kum ki riewpaidbah hi, la sngewthuh ba ka daw hi ka dei na ka jingbym treibha ïa ka kam. Kane ka jingjia ka pyni shai ba u Officer ba dei ban khmih ïa ka kam, ula kheiñ sting ïa ka kam bad ailad ban trei tangdep ïa ka kam” ong u Bah PN Syiem.
“Ka Sorkar Jylla ka dei ban thung ïa ka jingtohkit ba laitluid. Kan bha shibun lada ka Central Agency kan pynlong ïa ka jingtohkit khnang ba ki briew ba don bynta ha ka project lane ba donbynta ha ka jingjia kin ïoh ïa ka jingpynsajia” ula bynrap.
Haba kylli, une u Nongïalam ka MPCC ula dawa ïa ka Sorkar Jylla ba ka dei ban pynsangeh shuwa ïa ka jingtei jong kane ka project katba ka sorkar kam pat ïoh pdiang ïa ka kaiphod jong ka jingtohkit.
U Bah Pynshngaiñ ula pynpaw ruh ba ka Sorkar Jylla ka dei ban tah dak iong noh (black list) ïa ka kompani Badri Rai & Company bad ban pynsangeh lut ïa baroh ki kam ba ka kompani ka pyntrei hapoh ka Jylla.
Haba pynpaw ba kane kam dei shuh tang ka kam bamsap hynrei kaba buh jingma ruh ïa ka jingim ki nongtrei ha ka jingma, u Bah PN Syiem ula ong “Ngi ainguh ïa u Blei ba kane ka jingtwa kala jia mynta ba dang ïaid ka jingtei ym hadien bala dep bad pyndonkam ïa kane ka jingtei”.
Haba pynsngew ïa kane ka juh ka sur, ka Working President Deborah Marak ruh kala dawa ban thung da ka jing tohkit ba laitluid halor kane ka jingjia bad ong “Ka long ka khubor ba sngewsih bad ka pynlehraiñ ïa baroh baroh. Ngi na ka MPP ngi sngewkhia halor kane bad ngi dawa ïa ka jingtohkit ba laitluid ban tip ïa kaei ka daw jong kane ka jing twa”.
Ka jingpyndait ïa ka dome (tnum shynrong pylleng) jong ka Ïingdorbar Thaw Aiñ ka Jylla ka dei kaba dang shu leh dang shen hynrei kala khyllem noh ha ka step phyrngap jong ka Sngi U Blei.