Nongpoh, Jymmang 23: Kum shibynta ban wanrah ïaka khuid ka suba kaba dei ruh shibynta jong ka jingkoit jingkhiah, ki nongtrei Accredited Social Health Activist (ASHA) naka thaiñ Umden mynta ka sngi kila mih shakhmat ban pynlong da ka prokram pynkhuid (Cleaning Drive) ïaki sawdong sawkun jong ka Umden PHC kaba dei kawei naki jaka sumar ba ai jingshakri ha katei ka thaiñ bad kumjuh ruh ki surok bah ter ter shaduh jaka pynieng taxi jong ka shnong Umden kum ka nuksa ban hikai ruh sha ki paidbah ban lehkhuid bad ban kiar naka jingbret pathar ïaki jabaiñ.
Ha katei ka jingpynkhuid ïaka Umden PHC bad kiwei kiwei ki jaka la shim bynta ruh da ki ASHA naka thaiñ Umden haka jingdonlang ki nongïalam ba kynthup ïaka kong Soni Kharjana Adviser bad ka kong Mirajune Marsing President ka Meghalaya ASHA Workers Union (MAWU), bala wan ban ai mynsiem bad don ryngkat lang da u MLA ka Nong poh u Bah Mayral Born Syiem bad kiwei kiwei ki riew rangbah.
Hadien ka jingpynkhuid naka liang ki ASHA kila pynlong ruh ka jingïalang ha Umden PHC ban pynkup burom ïaki 3 ngut ki longkmie kiba dei ki ASHA Facilitator ba kynthup ïaka kong Genevieve Maiong, Nerila Syiem bad Jom Syiem bad kumjuh ruh ïa u Bah Mayral Born Syiem MLA ka Nongpoh halor ka jingkloi jong u ban sngew bad sngap ïaki jingeh jong ki ASHA bad ban kren ruh ha iing Dorbar Thawaiñ ka jylla halor ka jingeh ki ASHA kiba kynduh shibun ki jingeh bad ju mih surok naka por shaka por ban dawa ïaka hok.
Haba kren ha katei ka sngi naka liang u Bah Mayral Born Syiem u la pynpaw ka jingsngew kmen kaba khraw ban iohi ba ki ASHA kila shim ïaka sienjam ban pynkhuid ïaki sawdong sawkun ka Umden PHC khamtam ha kum kane ka por lyiur ba donkam ïaka khuid ka suba bad kumjuh ruh ki surok bah haka thaiñ Umden nalor ka kam kaba ki trei shitom ban ïarap ïaka tnad ka koit ka khiah bad kane ka long ka nuksa kaba bha ïaki paidbah ban wanrah ïaka jingkhuid jingsuba haki shnong ki thaw ban lait naki jingpang jingshitom.
U la ai ruh ka jingïaroh ïaki ASHA halor ka kam kaba ki trei bad ym lah shuh ban siew kylliang halor ka jingtrei shitom jong ki ban rung sha man la ki thliew iing ban pynthikna ïaka jingkoit jingkhiah khamtam ki longkmie ba armet bad ki khyllung khynnah, wat haka jingsiew kaba rit eh bad shem jingeh ban pyndap ïaka iing ka sem kiba ju mih ruh sha surok man ka por ryngkat ki placard ban pynsngew ïaki jingeh sha ka sorkar bad ban dawa ïala ki hok ba ki dei ban ioh.
