Pynbna ka MeECL ban khang ïaid kali na jingkieng Umïam naduh ka 31 tarik Lber

Shillong, Lber 21: Ka Tnat sam bording ka jylla ka Meghalaya Energy Power Generation Corporation Limited (MePGCL) ha ka sngi palei ka la pynbna ba kan khang ïaid kali na ka jingkieng Umïam (Damsite) naduh ka 31 tarik Lber haduh ka 8 tarik Ïaïong namar ka jingmaramot ïa ka jingkieng ka dang ïaid shaphrang bad na ka liang ka tnat ka la pyntip ruh ba ïa kane ka jingpynbeit ïaid kali kadang dei tang ka jingtyrwa bad ka shong pat ïa ka sorkar ba kan pynbna khambniah shwa ka 3 sngi lada pyntreikam ïa kane ka jingtyrwa ban khang ïaid kali.
Ka tnat ka la pyntip ruh ba ha ka 31 tarik Lber, ka jingkhang ban ïaid kali kan treikam tang hynriew kynta, naduh ka por 8 baje mynstep haduh ka por 2 baje janmied. Ka la ong ba tang ki Ambulance yn shah ban ïaid ha kane ka por.
Ka MePGCL ka pyntip ruh ba hadien ba la dep pyntrei ïa ka kam, yn sa plie noh ïa shiliang jong ka surok ba pynnoh sha kaphang jong ka wah, ba kin ïaid ki kali kiba khia hapoh ka 4 ton. Ka jingplie ïa shiliang ka surok kan long ha baroh kine ki phra sngi haduh ka por 7 baje mynstep jong ka 8 tarik Ïaïong.
Ka la pyntip ruh ba hadien ka 8 tarik Ïaïong, hadien ka por 7 baje mynstep, yn sa shah ban ïaid sa ïa ki kali kiba hapoh ka 15 ton na ka phang jong ka surok ba pynnoh sha ka liang ka wah.
Ka la kyntu ruh ïa ki Deputy Commissioner ka East Khasi Hills bad Ri-Bhoi District ba kin ithuh ïa ki jaka hashuwa ban poi sha ka dam na ka bynta ban pynïeng ïa ki kali hapdeng ka por 8 baje mynstep haduh 2 baje janmied jong ka 31 tarik Lber.
La kyntu ruh ïa ka Tnat PWD ba kan shong bishar bad ithuh ïa kiwei pat ki lynti ïaid ha ka por ka jingkhangdam ba 6 kynta ïa ka jingkieng ban ïaid kali ha ka 31 tarik Lber ban lah pynïaid ïa kiwei pat ki kali kiba khia palat ïa ka 4 ton.