Don ki kynhun shitniam kiba treikam da ka hukum ki briew ba don ha ka bor, ong u Bah Mayralborn

Shillong, 21 Lber: U nongïalam ka UDP bad u MLA ka Nongpoh u Bah Mayralborn Syiem u la ong ba ki don ki kynhun shitniam kiba treikam shitrhem bad kiba pyrshang ban shim kabu ïa ka jinglong kaba don jingma ka jinglong jingman ha kaba ïadei bad ka niam ne jingngeit ha u pud u sam ka jylla Meghalaya bad Assam shibynta jong ka ri bad ka jylla ka donkam long kaba husiar bad peitngor bha.
“Ngam dei ba nga kynnoh ïa baroh ne ïano ïano hynrei ka dei tang kawei ka kynhun ki briew kiba pyrshang ban shim kabu ïa ka jinglong syier ka jinglong jingman ym tang ha kaba ïadei bad ka niam hynrei ïa ka shongsuk shongshngaiñ ka kolshor hapoh ka jylla. Ki la don ki kynhun pynkheiñ aiñ kiba pyrshang ban shim kabu bad kine ki shitniam ki treikam bha ym tang ha khappud ka jylla Assam bad Meghalaya hynrei kane ka la jia ha baroh kawei ka ri,” ong u Bah Syiem da kaba pynkynmaw ba ki la don ki jingjia ba leit tah poster bad kiba donkti ban ai bor da kiba don ha ka bor khlem da ïoh ka jingmynjur kaba dei, ban shim kabu halor ka niam bad halor ka pule puthi hapoh ka thaiñ Marmain kaba ha khappud bad ka Assam.
U la ong, “Ngi dei ban pynthikna ba ki briew jong ngi kiba sah khamtam ha ki thaiñ khappud kin I’m suk bad kum shi para. Ïa ngi la ai ka jingïada da ka Riti synshar ka Ri kaba itynnad kum ka ri kaba long laitluid ha ka niam ne jingngeit ha kaba ngi long kiba laitluid ban bud ïa kano kano ka niam kaba ngi kwah bad ngi khmih lynti ïa kane ba kan ïaid”.