Khliehriat, Jymmang 22 : Ki heh nongialam jong ka party United Democratic Party hynnin ka sngi saitjaiñ ki la hiar sha shnong Sohkymphor East Jaiñtia Hills District bad la pynskhem ïa ki nongialam jong ka U.D.P Youth Wing East Jaiñtia Hillls District, la pynskhem ïa ki nongkitkam jong ka Youth Wing da u Lamphang ka iïng thaw aiñ, uba dei ruh u President rangbah ka UDP, u bah Metbah Lyngdoh.
La pynshong khia shuh shuh ïa kane lympung jingialang da ka jingwan shim bynta lang ruh da ki paidbah bad ki samla na ki shong bapher bapher kiba hap hapoh ka 6-Khliehriat Constituency.
Haba kren ha ka jingialang, u President rangbah jong ka UDP, u bah Metbah Lyngdoh u la phai dien sha ka mynnor ba la leit, ba ki nongialam kiba la leit noh, Bam kwai ha dwar u Blei ki ju angnud bad ong ruh ba ki dei ki rangbah kiba iohi jngai, u la kular ba un bud iai buddien ïa ka jingangnud jong ki bad u kwah ruh ba ka jingbud dien jong u kan long da ka jingiatrei lang ryngkat ryngkat jong baroh ki dkhot bad nongialam jong ka party bad lyngba ka jingiatrei lang khlem pep yn lah ban pynurlong ïa ki jingangnud jong ki nongialam kiba la leit noh.
Ha ka juh ka por, u bah Metbah Lyngdoh, u la ai ka jingkhublei kitbok kitrwiang ïa ki nongkitkam jong ka U.D.P Youth Wing (EJHD) bad ngeit ruh ba u Blei ruh un don ryngkat-ryngkat bad btin lynti ïa ki samla bad khmihlynti ruh ba ka U.D.P Youth Wing, EJHD kaba hapoh ka jingialam u President, u bah Coming Tlang ki samla kin lah ban sei ïa ki soh kiba bun ha kane ka election ka ban wan “Ngam iohi ba kan don ka jing artatien ban jop ha u 2023 na baroh ar tylli ki constituency ha East Jaiñtia Hills District ” bynrap u bah Metbah.
U la ong ba ka party ka donkam ruh ïa ki rangbah bad kumjuh ruh ki samla ban pyntyllum ïa ki kam jong ka party bad hadien ba la ioh ïa ka jingjop yn pyntyllun ruh ïa ki kam kiba iadei bad ka imlang ka sahlang “kumba long mynta ka don ka jingkhih win hapoh ka jylla jong ngi wat shaduh ri lum Garo ba ia ka party UDP kaba ki ju ong ka party Khasi/ Jaiñtia mynta ki la sdang ban wad ia ki nongialam ka U.D.P, na kane ka thaiñ Jaiñtia hills ruh kin don ki nongialam, ki MLA ki ban sa wan ïa snoh noh bad ka party UDP bad kin iakhun ruh na ka party UDP, kumjuh ruh ngi la dep ban iakren bad iakut bad ki katto katne ki MLA, ka jingkwah iakhun jong ki na ka party UDP ka dei na ka daw ba ki iohi ïa ka jingthylli ha ka synshar ka khadar, ngi sngew kmen ba ka lyer jong ka U.D.P mynta ka la beh kylleng sha baroh kawei ka jylla.
Haba kren shaphang u bah Kyrmen Shylla, u bah Metbah u la pynpaw “Ngi iohi ba ha kine ki saw snem tam u MLA ka Khliehriat u la pyrshang katba lah ïa ka ban ai ïa ka jingshakri ïa ki paidbah”..
U la kular ruh ba un shim khia ïa ka jingeh ka shnong Sohkymphor ha kaba iadei bad ka jingioh bor ding kumba la dep pynsngew da u Waheh Shnong Sohkymphor, u ma Kmen Lapasam.
U bah Jimino Mawthoh, u la ong ba ka party UDP kan sei ïa ki nongialam na ki constituency bapher bapher ban ioh ban saiñdur biang ha kane ka saiñ hima sima ha kane ka jylla ha ka lynti kaba dei bad ha ka rukom kaba dei, u khmihlynti ba ha u 2023 kan don ka jingkylla “Mynta ngim lah lait na kane ka sorkar synrop, ka sorkar khleh khaw lang ba la ialam da ka party NPP bad nga khmih lynti ba ha u snem 2023 ka UDP kan ialam” ong u bah Jimino bad u kyntu ruh ïa ki paidbah ba kin trei shitom ban kyntiew ïa ka party.
Haba kren sha ki paidbah ha shnong Sohkymphor, u bah Jimino u la bynrap ruh da kaba ong “Phi la rah ïa u bah Kyrmen Shylla ban long u MLA, ban long u myntri sorkar ban long u President Yoth Wing ha ka jylla bad ngi kwah ba sa shisien biang ba phin ai ka jingkyrshan ha u 2023 ïa u bah
U MLA jong ka Khliehriat Constituency, u bah Kyrmen Shylla, u la ai ka jingkhublei bad kitbok kitrwiang ïa ki dkhot jong ka UDP Youth Wing EJHD bad pynpaw ruh ba ka la i donkam ban sdang ban thaw noh ïa ki Unit bad ki Circle bapher bapher jong ka party khnang ban dup lah ban kyntiew shuh shuh ïa ka party.
Haba kren shapnag ka party UDP, u bah Kyrmen Shylla u la ong ba ka party UDP ka dei ban ïada ïa ka jylla, ban ïada na ki mynder, ban pynneh ïa ki riti dustur, pynneh pynsah ïa ka ktien ka thylliej, namar ngi don tang kane kawei hi ka ri ym don shuh pat da kawei.
U la kular ruh ba un shim khia noh mardor ïa ka jingdonkam ka shnong Sohkymphor ha kaba iadei bad ka jingbit jingbiang ka bor ding bad ki surok kumba la pynpaw da u Waheh Shnong, kumjuh ruh u la ong ba un thaw ki lad ki, lynti ban ioh ban pyndep ïa ki kam kiba dang sahteng ha kiwei kiwei ki shnong ruh.
U President UDP Youth Wing East Jaintia Hills District, u bah Coming Tlang, u kyntu ïa ki paidbah ban pynduh noh ïa ka jingiakynnoh, ïa ki jingkynthoh ba lai phewjait hynrei ban ieng da ka jingiatylli ban ïa phylliew jingmut lang na ka bynta ka jingkiew ka District, la ong ruh ba lada ki samla ki trei shitom khlem pep kan wanrah ïaka jingjop ka party, u kyntu ruh ïa ki samla ban long kiba kit khia ïa ka kam, kiba don ka jingkyrmen ban long ki nongpeit nong ri ia ka lwei jong ka ri bad mukuk jong ka bri u hynniewtrep.
Ki nongialam jong ka U.D.P Youth Wing East Jaintia Hills District kiba la jied bad pynskhem myn ha ka sngi saitjain, ki kynthup u President, u bah Coming Tlang, saw ngut ki Vice President ba kynthup u bah Graham Lyngdoh, u bah Piarly Lyngdoh, u bah Lukas Shylla bad u bah Yoohimi Shylla, General Secretray u bah Heipor Uni Bang, Assistant Secretary, u bah Greatfulson Siangshai, Treasurer, u bah Karlud Dkhar, Chief Youth Organiser, u bahB.Dkhar, Youth Working President, u bah Zosiama Thianglai bad u bah Shanbor Lamare, Sport Secretary, u bah Postling Dkhar, Education Secretary, u bahChelang Ryngkhlem, Media Cell, u bahKarbarlang Pajuh, Chief Adviser, u bah G.R.Bareh, la jied ruh ïa baroh ki M.D.C kum ki Adviser.
Ia ka prokram la pyniad da u M.D.C Khliehriat u bah Fineliness Bareh.
