Jowai, Lber 08: Ka Hynñiewtrep Integrated Territorial Organization (HITO) Jowai Circle mynta ka sngi hapoh ka jingïalam u President samla Owan Paswet bad u Finance Secretary samla Lakhon Challam kila leit ban buddien ïa ka rukom ai jinghikai ïa ki khynnah skul SSA kiba don hapoh ka West Jaiñtia Hills District.
Ka seng hadien bala ïoh lad ban ïakynduh bad ka District Mission Co-ordinator (DMC) ka kong Mumubai Lakiang kaba dei peit ïa ki skul SSA hapoh ka West Jaiñtia, ha ka jingïakynduh ka seng kala ïoh ban phylliew jingmut shibun eh haka jingïadei ban kyntiew ïa ka pule ka puthi hapoh ki skul SSA.
Ka seng kala buh ruh ka jingkyntu ïa baroh ki skul SSA ba kin shimkhia ïa ka lynkor ai jinghikai khamtam ïa ki nonghikai kiba don ka bynta kaba khraw na ka bynta ka lawei ki khynnah skul.
Ka seng ka pynpaw ka jingsngew diaw bad sngewsih ban peit ïa ka rukom hiar palat ka pule puthi katba dang mih ki snem bad ka jingduna ki khynnah skul hapoh ki karma klas kaba jur bha nalor ba duna kiba pynrung skul ïa ki khynnah ha ki skul SSA.
Sa kawei kaba sngewsih ka long lada peit ki don tang katto katne ki nonghikai kiba thung da ka School Managing Committee (SMC) ha ki skul SSA kine ruh ki dang ap ïa ka kam sorkar, la pynsngew ruh ba kitei ki nonghikai ki wan hikai tang ban pyndep rukom namar wat ïa ka tulop kim ïoh satia bad kane kala buh jingeh ïa ka pule puthi hapoh ka jylla hi baroh kawei la pynsngew ka seng.
Halor kane lada jia kumne shi kumne ka seng ka ong ka jingduh nong ka dei ïa ki khynnah kiba pule hapoh ki skul SSA. Na ka liang ka HITO Jowai Circle mynta ka dang buddien ïa kane ka kam khnang ban pynjanai ïa ka rukom ai jinghikai ïa kito ki khynnah kiba leit skul manla ka sngi bad kiba bun ki khynnah kiba leit pule ha ki skul SSA ki dei kiba wan na ki longïing ba duk.
