Shillong, Jymmang 21: U Myntri ka Tnad Education, Skill Development and Entrepreneurship ka Sorkar Pdeng u Dharmendra Pradhan hynne ka sngi saitjaiñ ula pynthikna ba baroh ki College kiba iasoh bad ka North Eastern Hill University (NEHU) kin ym don bynta eiei ruh em bad ka Common University Entrance Test (CUET).
Hadien ba shong bishar ïa ka pule dangle ha Jylla, u Pradhan ula ïathuh ha ki lad pathai khubor ba ki College ba pynïaid da ka Jylla kin dang ïai bteng ban iasoh bad ka NEHU tad haduh ba ka Jylla Meghalaya ka don ïala ka jong ka University.
“Paralok, u Myntri Rangbah ka Jylla ula ïathuh ha nga ba ki dang pynkhreh ban wanrah ïala ka jong ka University. Namar kata, katba ka Sorkar Meghalaya ka dang kwah, ki dang lah ban bteng ïa ka jingpyniasoh bad ka NEHU hynrei kin nym iadonbynta satia bad ka CUET ha ki snem ban wan ruh kumjuh” ula kular.
Kane ka jingpynshai jong u kala mih ruh hadien ka jingkulmar jingmut la ka jingpyllait ïa ka CUET ïa ka Jylla Meghalaya ka long tang na ka bynta une u snem 2022-2023.
Ha ka 12 tarik Jymmang, ka Sorkar Pdeng kala rai ban pyllait ïa baroh ki College ba iasoh bad ka NEHU na ka jingtreikam jong ka CUET.
“Haba shong bishar ïa ki jingpynsngew jong phi kum ka jinglong ka jaka, ka jinglong jaka lum, ka jingjngai jong ki shnong ki thaw, ka jingbym biang ki kor digital bad kiwei kiwei, baroh ki college ba iasoh ba ka NEHU kin dang ïai bteng ban pynrung klas ïa ki samla pule kumba ju leh baroh shikatta ha ka jaka jong ka CUET” ong u Pradhan ha ka shithi bala phah sha u Myntri Rangbah ka Jylla.
