Shillong, Lber, 01: Ka Hynñiewtrep Youths Council (HYC) Laban Circle ka ai ïa ka jingkyrshan bapura ïa ka jingdawa jong ka KSU, Laban Circle ban kyndang mardor ïa ki briew kiba sah bad shong be-ain ha Maxwelton Estate.
Ha u kyrwoh ba la phah sha ki lad pathai khubor, ka HYC ka pynrem jur ïa ki bor Sorkar kiba ïada dohïap dohim ïa ki nongwei kiba shongthap ha ki jaka jong ka Sorkar la ka long ïa kiba sah ha Them Metor ne ïa kine kiba sah ha Maxwelton Estate.
Ka Seng ka maham ruh ïa ki bor Sorkar ba kim dei ban shim sting bad ap haduh ban pynkylla ïa kane ka jaka kum ka Them Metor 2.0 bad kut tang ha ka jingthung ïa ki “High Level Committee” ban pynbiej ïa u paidbah ki bym ai pat ïa uno uno u soh namar ki shu kut tang ha ka jingshong jingïalang bad ai khubor na kawei ka por sha kawei pat.
“Kumba, lah kren da ki nongïalam ba hakhlieh jong ka seng ba ka Sorkar kam dei ban klet ba dang don shibun ki paradoh parasnam ki jong ngi ki bym don ïa ka jaka tang ban shna ïa shi nongrim ka iing bad lada ïa kiwei ka Sorkar ka lah ban ai mon ba kin shong kin sah ei ha ki jaka jong ka Sorkar. Ka seng kan shim ïa ki sienjam ban ïalam ïa ki paradoh parasnam ban buhai shnong bad shna ing ha ki jaka Sorkar kylleng ka Bri u Hynñiewtrep bad khamtam eh hangne ha Shillong,” la ong ka seng.
“Ka seng ka kwah ruh ban kren da kaba shai sha baroh kiba peit khmat bha ïa ka jinglong jong ka jaidbynriew ka jong ngi ba ngi lah ban don ha ki lama ki bapher bapher hynrei ha kaba ïadei bad ki mat kiba ïa tyngkhuh bad kiwei pat ki jaidbynriew ne ki bor ba don jingthmu basniew ïa ka jaidbynriew ka jong ngi khamtam ki nongbuhai shnong be-aiñ, ngi long kawei ka jingmut bad ka jingthmu bad “kata ka long ban ïada bad pynneh pynsah ïa la ka jaidbynriew,” la bynrap ka HYC.
