Nongstoiñ, Rymphang 29: Kum shi bynta ban ai ka jingshakri kaba bit ba biang na ka bynta ka jingdonkam sha ki paidbah jong ka West Khasi Hills District, ka Industrial Development Bank of India (IDBI Bank) ka la plie ha ka sngi balang jong ka taiew ïa ka tnad treikam thymmai jong ka hapoh sor Nongstoiñ.
Ïa katei ka bank thymmai la plie paidbah da u bah H.K.Thabah MCS Additional Deputy Commissioner kum u kongsan, ha ryngkat ka jingïasynranlang u bah T.Diengngan Block Development Officer ka Nongstoiñ C&RD Block kum u symbud kongsan.
Kiwei pat kiba la don ban sakhi lang ïa kane ka sngi sah kynmaw ki kynthup ïa u Bah Srally Rashir rangbah shnong ka New Nongstoiñ, kong Badari Wankhar Branch Manager ka IDBI Nongstoiñ Branch bad kiwei kiwei ki riew rangbah jong ka shnong.
“Ka jingpynïar jong katei ka bank ïa la ki shnat treikam ha ka thaiñ, kan long shisha ka jingkyrkhu kaba khraw ïa ki paidbah. Namar katba nang tyllun ki sngi ki por, ka jingbun paid ka la sdang roi bad tang da ki bank kiba la don lypa, kim lah shuh ban ai ïa ka jingshakri kaba kham biang pura kat haduh mynta mynne”, ong u kongsan.
U Bah Thabah kum u kongsan, u la kyntu jur ïa katei ka bank ba kan pynjynsur ruh ïa ka rukom ai ram ïa ki paidbah jong ka thaiñ. U la ong ruh ba ka dei ban pynpynïar shuh shuh ïa ka tnad sha ki thaiñ Nongkyndong kum sha Shahlang, Riangdo, Rambrai, Maweit bad kiwei kiwei de ki bynt jong ka District.
Katei ka bank kaba thymmai kaba la tip kum ka IDBI Bank ka don mar pyrshah bad ka ophis treikam jong ka PWD Nongstoiñ ha ka shnong New Nongstoiñ, West Khasi Hills District.
