Kadei ka jingmlien jong ki paidbah ka jylla ba kano kano ka jingbakla ne ka jingthut ha ka rukom treikam la ka long ha ki kam pynroi lane ha ki kam bhalang ba kin kynnoh beit ïa kiwei hynrei kim ju pyrkhat satia pat ba ki ruh kum ki nongkynnoh ki la dei ban pyrkhat 100 sien shwa ba kin kdew kti tang ïa kiwei. Bunsien la ju ïohsngew beit ba ki paidbah ki kynnoh tang ïa kita ki nongmihkhmat paidbah lada jia ba ka shnong ka sahdien, lane bym don ki lynti syngkien ha ki shnong ki thaw, nangta bym biang ka umbam umdih lane ki jaka pule bad jaka sumar. Hynrei kim ju tih pat ïa ka jingshisha kaei ka daw kaba pynlong ïa ka shnong ka thaw ban mad ïa kine kiei kiei baroh. Hato ki la ju kylli ba mano ba long ka daw jong kine, hato kadei tang ka jingkitkhlieh jong ki nongmihkhmat lane ki bor sorkar ne kadei ruh ka jingbym shim lang ka jingkitkhlieh jong ki nongshong shnong.
Don ki jaka ba ki paidbah ki thrang dik dik ban ïoh ïa ki jaka ai jinghikai lane ki skul kiba bha ban wan ha ka shnong ka thaw pynban haba la poi kum kitei ki skul don pat kiba pyrshah, hato kum ïa kine ïano yn kynnoh? Don pat ki jaka kiba thrang dik dik ban ïoh ïa ki surok kiba bha hynrei ynda la wan kum kata ka surok don kiba pyrshah ne pyneh ban ai ïa ka jaka. Ha kum kine ki khep ruh ïano yn kynnoh. Hato kadei ka jingbakla jong ka sorkar lane ka jingkitkhlieh lang jong baroh.
Ha kawei pat ka liang ymdei ba bein ïa kitei kiba pyneh ban ai jaka ne kiba pyrshang ban wan kum kitei ki kam pynroi namar lehse ki don la ka jong ka daw ba ki pyrshah, ka lah ban dei ba ka lah ban ktah ïa ki jaka rep lada wan kum kitei ki projek lane ïoh ka bai luksan kaba ki dei ban ïoh kam poi sha ki bad bun kiwei kiwei ki daw. Tangba kadei pat ka kamram jong ka bor shnong ruh ban tuklar lang khnang ba ka jingmyntoi kan long salonsar ym dei tang ïa kito kiba kyrshan bad pynduh noh ïa kiba payrshah.
Lada kren pat ïa ka ishu kaba bun ki sngewtynnad bha ban kren, kata shaphang kata ka bamsap kaba dei ka kyntien kaba khor bha bad kaba jylliew bha ka jingmut jong ka, don kiba pyrkhat ba dei tang ka bor pisa kaba dei ka daw jong ka bamsap hynrei hangne ruh ka don bun rukom kaba pynlong ïa ka roi ka pa ne ka ïoh ka kot ba kan neh hajuh khlem poi shaei shaei. Katno ngut kita kiba sngewthuh ïa ka jingmut jong ka kam bamsap la ka long ha ka jylla ne wat ha ka ri? Kane ka kyntien kadei kaba ki paidbah na ka por sha ka por ki ju ïakren shaphang kata ka kam bamsap bampong la ka long ha ki shnong ki thaw, ha ki District ne wat ha ka jylla ne ka ri, hynrei bunsien ka jingïakren ka la shu kut tang ha ka lyer bad kim sngewthuh pat ïa ka jingmut ba shisha jong ka kam bamsap.
Haba kren shaphang ka kam bamsap bunsien ruh ka ju mih kata ka jingkynnoh tang ïa ki nongmihkhmat (MLA &MDC) bad ïa ki ophisar sorkar, hynrei haba bishar bniah pat ïa kane ka kam bamsap mynta ka la rung lut ha baroh ki bynta kata naduh ki kam shnongkam thaw, ki kam ing kam sem, kam seng bad kiwei kiwei, kaba la pyntroiñ shisha ïa longbriew manbriew ha ka jylla bad ka thaiñ hi baroh kawei.
Katei ka jingsahdien hi kadei namar ka don ka daw tynrai, kata ka bamsap ha ki bun rukom, da ka pisa, da ki kam, da ki jingïa pyrshah bad kiwei kiwei kiba long thik kum ki thliem kiba kjit bad bam klop ïa ka hok jong u paidbah ba ka sorkar jylla ne sorkar pdeng ka la ju ïarap kyrpang lyngba ki kam pynroi jong u paidbah. Ha kawei ka bynta, ka jingkren ba sahdien ki kam pynroi ka dei na ka daw ka jingdon jong ka kam bamsap ka long kaba don nongrim, hynrei ban ong pat ba ka dei 100 persen tang na ka daw ka bamsap ka dei ka kam ka bym lah ban pdiang namar bunsien wat ki paidbah ruh ki ngop ha ka kam bamsap ha kaba kim ju pyrkhat ïa lade ba ki bamsap hynrei ki kloi ban kdew pat ïa ki nongmihkmat bad ki ophisar sorkar.
Lah ruh ban kdew shai hangne ba ka kam bamsap mynta ka la rung ha man la uwei pa uwei u briew khamtam ha ka por elekshon ba ki paidbah ki ju biej ïa ki sbai rupa kaba ki ju ïoh tang ha ka shi khyllipmat jong ka por elekshon hynrei ynda la kut katei ka aïom ksiar pat ki ju lynñiar ba duna kane katai kaba dei na ka jingleh bakla khlem da bishar bniah shuwa ban kner ïa ki Kti.
Hap ruh ban kynnoh ba ka kam bam sap mynta ka la rung ha man la uwei pa uwei u briew kaba ym da donkam ban shu kynnoh ne ban pynkitpap tang ïa kiwei bad lada ki paidbah ki sngewthuh shisha ba ka kam bam sap ka ktah ïa ka imlang ka sahlang bad ka roi ka par upaidbah ka la dei ka por ba ki hap ban ïa pyrkhat arsien na ka bynta ban shim ïa ka jingkitkhlieh hynrei ki dei ban pyrkhat ba ïa katei ka kam donkam ban rat dyngkhong shuwa ïa lade shimet bad nangta sa peit ïa kiwei.
Kumba ong ka ktien riewstad, “ wat peit ïa u thngiat kiwei, hynrei peit shuwa ïa u khung…..” bad dei hangta ngin sa lah ban pynduh pyndam bad ban pynduh jait ïa ka kam bamsap bampong ha ka imlang ka sahlang, ha ka ri ka raid bad ha ka jylla bad ka ri hi baroh kawei.
Ym lah ruh ban len ba wat ha kane ka juk jong ka jingbamsap, hynrei dang don pat kiba khuid bad kiba kwah shisha banpynduh jait ïa ka kam bamsap ha kaba la donkam ban ai ruh ban ai ïa kajingïaroh. Ka jingkylli pat ka dang mih shuh shuh ba la jin ba man la uwei pa uwei u nongshong shnong u khuid ka mynsiem bad u don ïa ka jingïohi jngai na ka bynta ka bha ka miat, ka roi ka par jong ki paidbah, kam don jingeh satia ban pynduh jait ïa ki kam bamsap kiba long ki kruiñ kiba ktah ïa ka kam ïap kam im jong ki paidbah.
Lada ngi kwah ba ka imlang ka sahlang kan long kaba khuid to ngin ïa phai khmat khyndiat kiei ki jingjot ba wan rah ha ka imlang ka sahlang da ka jingdon ka kam bamsap. Khlempep ka jingjot kaba wanrah na ka jingbam sap ka ktah lut ba baroh ki bynta jong ka imlang ka sahlang ha kaba lada phai sha kino kino ki bynta ruh ngi la long lypa kita kiba shah knieh jubor ne knieh jyndat ïa ka hok kaba ngi dei ban ïoh. Bad dei namar kata ba ki shnong ki thaw, ki ri ki Raid bad ka jylla ka dang sahdien ha baroh ki liang kiba dei ki daw tynrai ba mih na ka jingdon ka jingbamsap bam phong.
