Paw pyrthei biang ki kali tah ïit ïong !
![](https://mawphor.com/wp-content/uploads/2022/02/editorial.jpg)
Ka long kaba shisha ba ka jingpyndonkam ïa ki ïit ïong ha ki kali ka la kylla ne pynlong ïa ki kali ki jaka rieh jong kiba bun ki riew shim kabu naduh ki kam ïaluh samla lyngkar haduh ka jingïadih ïabam sngewbha kaba pathar, naduh ki jingioh riehtngen jong ki riew pyntriem haduh ka jingshah shim kabu ki riew lui lui khmatam lei ki kynthei hynnah samla. Baroh ki sngew ba ka jingdon jong ki iit iong kiba ym don ba lah ban iohi ka ai jingshngain ia kiba leit ba wan marwei bad ruh ka buh rieh ia ki tiar ki tiar kiba ki kit ki rong, bad bunsien ngi klet ba kane ka juh ka iit iong ka buhrieh ruh ia ki riew shim kabu bad ka ai jaka rieh ruh ia ki riew pyntriem ha kitei ki kam kiba har rukom kaba niew hakhmat. Ym lah ban len ba ka jingpyndait iit iong ia ki kali kam dei tang ba ka pynioh ne pynduh jingmyntoi, hynrei ka kham pynitynnad shisha hi ruh ia ki kali ba ju pyndonkam shimet. Naduh hynnin ka sngi la lah ban iohi ia ki pulit ka jylla ba ki la sdang ban tar ia ki kali tah iit iong, hynrei hato katei ka jingtar ka kut noh noh tang hapdeng ki riew paidbah, kumno shaphang ki heh sorkar pat? Ka ain kam dei ban long tang ia ki paidbah, hynrei ka dei ban long beit 100% na ka bynta baroh.
Ka sorkar lyngba ka tnad pulit ka la pynih ia katei ka hukum ban tar ia ki iong la kham katto katne por naduh u snem ba la dep, hynrei katei ka ain ka la trei kam suki bha. Bun hi ki sakhi ia ka jingshisha ba wat ki kmie ki kpa kim tip shaei ki khun samla jong ki, ki leit namar mar la kiew ha ki kali iit iong ymtip shuh wat la ki don tang ha surok ba phyllaw iing ruh. Ki bun bah ki jingjia ha kaba ki riew lyngkar ki ialuh samla sahuh hapoh ki kali iit iong wat hapoh shnong poh thaw ruh tang ka kham kynjah briew kim salia shuh iano iano ruh. Ka jingiohlad ban don hapoh ka kali iit iong imat ia ka long hi kumba tap hapoh ka nep. La ju don ka jingjia ba ki riew shi kabu kim ju rung hi wat shapoh iing jong kita ba ki kam ba ki dei ki baieit jong ki, hynrei ki shu sangeh kali beit harud surok bad pynlong ka jingiakynduh bad jingleh sahuh beit tang hapoh kali. Katno ka long shisha kaba i jakhlia bad kane ka pynpyut shisha ia ka imlang sahlang.
Da ka jingiohlad ban pyndonkam da ki kali tah iit iong, bunsien wat haba kit jubor iano iano ruh ki paidbah kim lah satia ban tip namar ba ym iohi shapoh. Ki riew pyntriem ki ioh shisha ban rieh tngen bad katno ki sngewshngain ban leit ban wan bad pyndep ia ki jingthmu jongki. Khlem pep wat ki bor ka ain hi kin shem jingeh shibun eh wat ban buddien ia ki riew sniew kiba leit ba wan namar ba kim lah ban iohi ba mano ba don ha ki kali ba la tah iit iong. Khlem pep ruh ki kmie ki kpa kiba don ki khun samla ki iakynduh jingeh shibun ban pynthikna ba ki khun jong ki, ki leit ki wan bad ki briew kiba kumno. Ka long kaba suk ia ki riew shim kabu ban shet kylla iano iano bad ban leit da ka kynhun wat hadien ba la iakut tang para marwei. Lada dei ba ym don ka jingkah ka iit iong da kaba suk lah ban iohi mano ba don hapoh ka la ki bad la lah ban sngewthuh lypa ban kiar ne iada na ka jingjia ba sngewsih kaba lah ban jia.
Ka jinglah ban weng ia ki iit iong wat la lehse kam long ei ka lad jingiada (solutions) ba 100% ban khanglad ia ki kam sniew, hynrei khlem pep kan kham tehlakam bad wanrah ia ka jingsngew shynrain pyrshah ia ki kam sniew ba bun jait. Ki samla kiba dei khamtam ki khun ba riewspah kin sngew thait shibun eh namar ba kin duhlad ban lum paralok hapoh kali iit iong bad pynlong mobile sitting room (kamra shongkai ba iaid), pynheh jingtem baroh shi lynter surok bad leh sahuh kum ka jingiadih beer, ialuh samla lyngkar bad kumta ter ter. Ha ka juh ka por ki riew bymman kin ym lah ban iaid laitlan namar ba wat lada ki shong hapoh kali ruh lah ban iohi ia ki da ki paidbah bad ruh da ki briew jong ka ain.
Kan long hi ka jingbishar hok ia ki paidbah lada ka sorkar kan lah ban weng lut ia baroh ki iit iong na ki kali. Hooid, don kiba ong ba ka long ka jingduh jingmyntoi lada weng noh ia ki iit iong namar kito kiba niah kali marwei sha ki lynti ha kham jngai bad por mynmiet kin sngewshngain namar ba ki riew shim kabu ki lah ban tip da kaba suk katno ngut ki don briew hapoh kali. Khamtam ki kynthei kin ym shngaiñ ban niah kali por miet. Ha ka juh ka por kan pynsalia ruh ban ieh ia ki kali ha ki jaka sangeh ryngkat bad ki tiar kiba shongdor kum ki Lab Top bad Mobile bad kiwei pat ki tiar ba ki leit siew leit pet namar ba ki nongtuh bad riew shim kabu kin lah da kaba suk ban iohi don aiu hapoh kali. Hynrei ka jingkylli mynta ka long haduh katno katei ka ain ka treikam namar ba kane kam dei satia ka sien nyngkong ban pynmih hukum ban weng ia ki iit iong, hynrei haduh mynshuwa ruh na ka por sha ka por ka la ju jia.