Shillong, Rymphang, 11: Hadien ba ki seng ba la kynnoh ba kidei na ki seng shit niam Hindu ki la ai por 15 sngi ïa ki bor pynïaid skul jong ki skul Khristan hapoh Assam ba kidei ban wengnoh ïa ki dur mot jong u Jisu bad ka Maria bad ba ki la dawa ïa ki Nongïalam niam bym dei ban phong ïa ki jaiñ niam hapoh ki skul, mynta sa ki skul missionary ha Tripura ki la leit ïakynduh ïa ki bor pynïaid district ban ai ki lad jingïada na ka kynhun ki briew kiba la pynithuh ïalade kum ki dkhot jong ka seng Hindu Jagran Manch and Sanatani Dharma ba ki la dawa ban pynlong ïa ka Saraswati Puja hapoh ki jaka pule ki Khristan la kumno kumno ha ka 14 tarik mynta u bnai bad kane kadei ban long beit.
Ka Tessy Joseph, u principal jong ka Don Bosco School ha Dhajanagar kaba ha Shnong Udaipur, ha ka shithi aplikeshon sha Magistor ka Gomati district kaba la kyrpad ïa ki lad jingïada lyngba ka aiñ, ïa ki jingdon jingem bad ki hok ba la ai hapoh ka riti synshar ka Ri India.
Kum kine ki juh ki jingdawa ban pynlong puja ka la jia ruh ha ki Skul kiba ha kaba la pynlong ïa ki nongmihkhmat jong ki skul missionary ha ka thaiñ shatei lammihngi ban pynlong ïa ki jingïalang mynta ka Sngi U Blei.
U Nongïalam ka Gomati district Hindu u Jagran Manch u la ong, ka kynhun jong ki briew kiba dei napoh ka Hindu Samaj bad katto katne ki kmie ki kpa ki la kynduh ïa ka principal jong ka Don Bosco School da ka jingkyrpad ban rakhe ïa ka Saraswati Puja ha kane ka Skul, kumba la rakhe ïa ka Christmas da baroh, namar babun na ki khynnah pule kidei ki Hindus.
U la ong ba kin leit ïakynduh ïa ki bor pynïaid district ban pan ïa ka jingkyrshan ban pynlong puja lada ki bor pynïaid skul ki kyntait.
Ha ki jingkyrpad jong ka ban ai ïa ki lad jingïada, ka Joseph ka la batai halor ka jingwan jong ki briew ha ka 8 bad 9 tarik mynta u bnai ban pynpaw ba ki kwah ban rakhe ïa ka Saraswati Puja ha ki skul.
Ïa ka skul la shna ha u snem 1999, bad ka don la ki hok ba la ai hapoh ka Article 29 bad 30 jong ka Riti synshar ka Ri.
Ha ka shithi jong ka principal ka la ong, “Watba ka skul jong ngi kadei na ka bynta ki rit paid Khristan kaba nyngkong la mut beit tang ïa ki Khristan hynrei ka skul jong ngi ka la pynïar ïa ki jingshakri sha baroh ki khynnah pule khlem da kheiñ ïa ka niam, ka kyrdan bad ban shakri ïa baroh ki longbriew kiba dei ki nongshong shnong ka ri India.”
Katkum ka shithi ka la ïathuh ba ka kynhun kaba nyngkong jong ki briew kiba la pynithuh ïalade kum ki dkhot jong ka Hindu Jagran Manch ki la wan ha ophis bad ha ka jingbym don ka principal ki la leit ïakynduh ïa vice-principal bad ki la dawa badei ban pynlong ïa ka Saraswati Puja hapoh ka skul. Na ka liang jong ka Vice-Principal da kaba burom la ïathuh shaki ba kadei ka skul jong ki Khristan jong ki rit paid bad ym lah ban leh ïa katei ka jingdawa naba ka riti synshar ka Ri ka la ailad ïa ki rit paid ka India ka hok ban thaw bad pynïaid ïa ki jaka pule katkum ka jingkwah bad ym lah ban leh palat ïa kane ka hok.
La ïathuh ba katei ka kynhun ka la leit phai noh da kaba byrngem ba kin pynlong ïa ka jaka pule ba kadei beit ban pynlong ïa katei ka Saraswati Puja hapoh ka skul, batai katei ka shithi.
Ha ka lah sngi Thohdieng, sa kawei ka kynhun hapoh ka jingïalam da kaba la ai kyrteng Pratim Datta ba pynithuh ïalade kum dkhot ka Sanatani Dharma” da kajuh ka jingdawa ki la banjur na ka liang u Datta u la byrngem ban wan ïalam da ki nongshong shnong bad ban wanrah ïa ka “Swamijis” hapoh phyllaw ka skul ban pynlong puja bad kane dei beit ban long (by hook or crook), ka la ong.
Sa kawei pat ka kynhun ha ka sngi Thohdieng bad ki la byrngem ïa ka Jospeh ba kan mad ïa ki jingeh lada kam shah ban pynlong puja, ka la bynrap.
“Ngi banjur biang ba ngi burom pura ïa ka Saraswati puja bad kiwei ki jingleh niam jong kiwei ki niam, bad ngi ïai pynneh ïa ka hok jong ka niam bad ban pynïaid ïa ka Skul katkum ka hynrei Article 30 jong ka Riti synshar ka Ri India. Hynrei ki la sngap mynthi,” ka la ong ha ka shithi.
“Kane kadei ka jinglong jingman kaba ngi la sngewthuh mynta bad kitei ki briew bad ki kyrteng ki lah ban leh ïa kaei kaei kaba long beaiñ bad ban wanrah jingma ïa ki jingdon jingem bad ïa ki briew bad ka jingleh kaba beaiñ ka long kumba pynkheiñ ïa ka hok ba la ai hapoh ka Article 30 jong ka Riti synshar ka Ri India”, ong ka shithi haba pan ïa ki bor jingïada.
