Col CK Nayudu Trophy: Tyngshaiñ u Santhosh ha ka inning ba nyngkong na bynta ka Meghalaya

Shillong, Rymphang 11: Ka kynhun ïalehkai jong ka Meghalaya hynne ka sngi ka la wanrah ïa ka jingïalehkai kaba itynnat ha madan MCA Ground, ha kaba ka kynhun ka la nang ïoh jingkyrmen ban khur ïa ka namjop ha ka U-23 men’s Col CK Nayudu Trophy plate group semifinal pyrshah ïa ka Mizoram.
U Abhishek Kumar u la khur 6/4 bad u PM Santhosh u la khur 4/29 bad lyngba kine arngut ka jylla ka la lah ban pynkhyllem ïa baroh ki rangtied ka Mizoram, tang 33 naki 10.4 over. Hadien kane, ka Meghalaya ka la tied 230 ron shuwa ban hap lut ki wicket ha ka inning tied kaba nyngkong. Nangta ka Mizoram ka la tied 18/1 ha ka inning tied kaba ar, bad ka dang sahdien da 179 ron.
Ka Mizoram ka la jied ban tied nyngkong hadien ba jop ïa ka toss. Hynrei ka jingïakhun kam shym la ïaid kumba la kyrmen, ha kaba ka kynhun ka la shah pynkhyllem noh hapoh 11 over, ka jingïalehkai kaba ym pat ju sakhi ha kane ka madan. Tang u Vanlalhruaia (wicketkeeper) u ba la tied 21, lait na u ym shym la don ba kynjoh sha ka phew ron, ha kaba hynriew ngut kim shym la kamai ron.
Ha inning tied jong ka Meghalaya, u Santhosh u la khyrwit 59 ron naki 94 bol shuwa ba un shah pynhap.
Hadien ka jinglah ban lehkai bha ka jong u ha ka bol, u Santhosh u la shitom noh ha ka pali tied, kaba la pynlong ïa u ban shem jingeh ban maren, bad hap ban tied tang da ki four ban kamai ron. Kane ka jingmynsaw, ka la jur ha kaba u la hap ban shong noh ha ka pali tied ba ar jong ka Mizoram .