Ai jingmut u Nongbishar Katakey Dei ban btep lut ïa baroh ki krem dewiong ha ka jylla

Shillong, Rymphang 19 : Ka Committee ba marwei briew ba la thung da ka ïing bishar High Court jongka jylla bad khlieh da u Nongbishar ba la shongthait u Justice BP Katakey ka la ai jingmut kat kum ka kaiphod ba Arphew ba la aiti sha ka ïing bishar ba dei ban btep ne pyndap khyndew lut noh ïa baroh ki krem dewiong hapoh ka jylla kata naduh kito kiba la shu ïeh ryngheng hadien ba la dep tih bad ïa kito kiba dang tih beaiñ mynta ruh.
“ Kine ki krem kim dei tang kito kiba la ïeh ryngheh ne ïeh shrah khlem treikam shuh hynrei wat ïa kiba dang tih dewiong haduh mynta ruh dei ban btep ne pyndap khyndew noh khnang ban ym jia shuh ka jingiap ki mynsiem briew ne ki mrad ruh lane ba ka um Acid ruh kan ym ïoh tuid pathar shuh” ong ka kaiphod.
Nalor kane la ai jingmut shuh shuh “ Namar kane ka jingbthep ne pyndap khyndew ïaki krem dewiong kan shim por bha kumta kaba donkam kyrkieh eh mynta ka long ba ïa baroh ki krem dewiong hapoh ka jylla dei ban ker sawdong da ki jingker khnang ban lait na ka jingiap ne mynsaw ki briew bad mrad”.
Na ka liang ka tnad Mining and Geology jongka sorkar jylla ka la pyntip sha ka Committee ba ka la dep phah ïa ka kaiphod sha ka sorkar jylla ha kaba ïadei bad ka jingpynkhreh ban btep ne pyndap khyndew ïaki krem dewiong da ka Central Mine Plan Design Institute (CMPDI) bad ka sorkar ka dang bishar bniah halor kane ka kam.