Lyngba ka VRK Mela angnud ka Sorkar Pdeng ban kyntiew ïa ka kam ri ñiang Ryndia bad Muka ha them Ri-Bhoi
Nongpoh, Rymphang, 08: Ka Regional Muga Research Station, Central Silk Board, Ministry of Textiles jong ka sorkar India haka jingïatreilang bad ka ophis jong ka District Sericulture Officer Ri-Bhoi District mynta ka sngi kala pynlong da ka Vanya Resham Krishi Mela ha District Library Nongpoh ban kyntiew ïaka rukom ri bad pynmih ïa u khñiang ryndia bad Muga khamtam ha Ri-Bhoi District kaba dei kawei naki district ba pawnam halor ka jingpyn-mih ïa u khñiang ryndia, ki jaiñ ryndia kumba ka thaiñ Umden-Diwon kala ioh nam ruh kum ka First Eri Silk Village haka jylla.
U Bah Mayral Born Syiem MLA ka Nongpoh u la wan ban shim bynta kum u kongsan ha katei ka sngi ban plie paidbah ruh ïaka jingpyninam (exhibition) ïaka rukom ri bad pynmih ïa u khñiang bad ksai ryndia haka jingdonlang u S.A.S Rehman Scientist-D RMRS Boko, Brajendra Choudhury Scientist-D (Retd) CSB, B.B Singha Scientist-D (Retd) CSB, Dr KM Vijoya Kumari Director CMER&TI Ladoigarh, R.B Lyngwa Zonal officer in charge District Sericulture Officer Ri-Bhoi District bad kiwei kiwei ki ophisar ryngkat ki spah ngut ki nongri khñiang ryndia bad muga na Ri-Bhoi District.
Haba kren ha katei ka sngi naka liang u Bah Mayral Born Syiem kum u kongsan u la ong ba kane ka jait prokram ka long kaba kongsan ban kyntiew ïaka kam ri bad pynmih ïa u Muga bad Ryndia khamtam ki nongri khñiang ki ioh ka jinghikai kaba bñiah naki riewstad jong ka Central Silk Board kumno ban dang pynjanai ïaka rukom pynmih ïa u khñiang ryndia bad muga, haduh ka rukom thir ksai bad ka jingpynmih ïaki jaiñ haki rukom bapher bapher.
U la pynpaw ruh ka jingsngew sarong kaba khraw bad ka thaiñ Umden-Diwon ha ka Raid Nongtluh kala shah jied kum ka Eri Silk Village haka jylla ban pynpaw sha ka pyrthei ba katei ka thaiñ ka dei ka jaka kaba khlaiñ ban pynmih ïa u khñiang ryndia, ka rukom thaiñ bad thir ksai bad kane ka jingwan jong ki riew stad na ka Central Silk Board kan long kum ka kabu ïaki nongri khñiang ba ka sorkar pdeng kan dang theh shuh shuh ki skhim naka bynta ban kyntiew ïa kane ka kam haka jylla khamtam haka thaiñ Ri-Bhoi.
Hynrei kaba sngewsih ka long ba bun naki jaiñ ryndia bad ki rukom pynmih bapher bapher la kam trai da kiwei da kaba pynmih ruh ki jaiñ ryndia kiba shu bud (duplicate), ha kaba ka long kaba kongsan ba ki nongthaiñ jaiñ kin ioh noh la ka jong ka jinglong trai ne (Geographical Indication Tag) halor ki jaiñ ba ki pynmih naka thaiñ Ri-Bhoi.
Ha katei ka sngi la ioh ruh ban pynlait ïaka kot halor ka rukom ri ïa u khñiang Muga bad pynmih symbai ryngkat ki khusnam bala sam sha ki nongri khñiang ryndia bad muga ba khlaiñ tam ha Ri-Bhoi District kum ka jingpynshlur ïa ki.