Ka jingplie paidbah jong u Myntri Rangbah ka Jylla u Conrad Kongkal Sangma ïa ka mashin ba la wanrah na ka ri South Korea kaba long kum ka pajwa na ka bynta ban pyndonkam ha kaba thang ïa ki ñiut bad ïa ki jaboh jabaiñ ba la lum na kylleng ka Sor Tura kan long kum ka jingsdang ban plie ïa ka jingkhang ïa kiwei pat ki District kiba dang ïaksaid haduh mynta ban wad ïa ka jaka theh ñiut kaba biang.
Dang ha kine ki khyndiat taiew ba la leit noh ka jingsatah ki ñiut bad ki jaboh jabaiñ na surok ka Ïawmusiang ha sor Jowai ka la pynkyndit bynriew ïa baroh ki Dorbar Shnong kiba la sdang ban khih khohreh ban wad ïa ki lad ki lynti ban weng ïa kane ka jingeh kaba ki paidbah kin sa ïakynduh hadien habud.
Ka jingbym ïoh jaka theh ñiut jong ka Sor Jowai bad ha kiwei kiwei de ki shnong kum ha Ribhoi District bad kiwei kiwei de ki jaka ka long na ka daw ka jingpyrshah jong ki paidbah na ka daw ba ki bor badei peit kim shym la shimkhia ban da pynsngewthuh janai ïa ki paidbah.
Hynrei kane ka sienjam ba ka Sorkar ka la wanrah da ka mashin thang ñiut na ka ri South Korea kan weng ïa kane ka jingeh kaba ki Dorbar Shnong ki la ïakynduh mawsiang baroh shikatta.
Watla ka Sorkar Jylla kam dei ban shong kli kti ban shu pynap lynga ïa kiwei pat ki District kiba donkam ïa ki jaka theh ñiut kiba biang namar ka jingkharoi jong ki nongshong shnong ka la kiew bha katba ki bnai bad ki snem ki nang ïai tyllun. Lada ka Sorkar kam kyndit thiah noh mynta ka kynti lehse ka jingeh kan long hi ïa u paidbah.
Kumba u Myntri Rangbah u la pynpaw ha ka jingïalang ba la plie ïa ka mashin thang ñiut ha Tura ba ka la don ka jingpyrkhat ban wanrah naduh u snem 2019 la sngewthuh ba ka Sorkar ka la pyrshang katba don la ki buit ki lad ban weng ïa kane ka jingeh kaba ki paidbah ki ïakynduh.
Ym tang ha Jowai, hynrei wat ha nongbah Shillong ruh ka Sorkar ka ladei ban wad ïa ki lad ki lynti ban buh ïa ka jaka theh ñiut kaba biang lehse da kaba wanrah da katei ka mashin na ka ri South Korea namar kumba ka long mynta kan sa poi ka por ba ka jaka theh ñiut ha Marten kan sa shlei bad ka jingma kan long hi ïa ka pung Umïam lada ki jaboh jabaiñ kiba la theh baroh shikatta kin tuid sha ka pung Umïam kan buh jingma ruh ïa ki jingthaw kiba im ha kane ka pung.
Ki la don ki khep ba ki jaboh na Marten ki la tuid sha ka pung umïam bad kane ka la wanrah ïa ka jingsngewkhia jong kiba bun balang khamtam ka jingsatah jong ki jaboh jabain ha lynti rim ha ki snem kiba la dep.
Ka Sorkar lyngba ka tnat Pynroi Sor ka ladei ban ïasyllok sani bha bad ki Dorbar Shnong khnang ban wanrah ïa katei ka mashin na ka ri South Korea namar lada ka kam kan urlong katkum ka jingkhmihlynti khlempep kan long ruh ka jingmyntoi hi ïa ki shnong ki thaw kiba dap da ka jingkulmar jingmut bad ka jinglynga haduh lano bad kumno yn pynkhuid ïa ki ñiut kiba mih na ki thliew ing jong ki briew.
Ka Sor Shillong ka la nang heh bad nang ïar bad ka jingkharoi jong ki nongshong shnong ka la nang kiew bad kan buh jingeh hi hadien habud ka lada ka tnat Pynroi Sor jong ka Sorkar Jylla kam kyndit bynriew ban pyrkhat lypa kumno ban weng ïa kine ki jingeh namarba kan sa poi ka por ba kaei kaba ladep jia ha Sor Jowai kan sa jia ruh ha kiwei kiwei pat ki shnong bad ha kata ka por mano ban shim ïa ka jingkitkhlieh.
Lada bishar sani bha ïa ka jingbym lah ban weng ïa kane ka jingeh ka dei na daw ba ngim pat don satia ïa ki teknoloji kiba biang katkum ka juk stad kaba mynta bad haduh mynta hi ngi dang hap ban shahniah sha kiwei ki jylla bad sha ki ri kiba nabar ban weng ïa kane ka jingeh.
