Hadien 2 snem ba lyngshop ka khlam, sdang biang ka Inter School Athletic Meet ha Ri-Bhoi
Wan shim bynta kumba 22 tylli ki skul
Nongpoh, Jymmang 18: Hadien 2 snem bala pynsangeh ïaka lympung ïalehkai sports jong ki skul bapher bapher ha Ri Bhoi namar ka khlam Covid-19, ka ophis u District Sports Officer Ri Bhoi District mynta u snem kala shim biang ïaka sienjam ban pynlong ïaka lympung District Level Inter School Athletic Meet 2022, bala plie pyrda ïaka hynin ka sngi ha madan NSCA Pahamsyiem.
Ïa katei ka lympung ïalehkai sports la wan ban plie pyrda da u Arpit Upadhyaya Deputy Commissioner ka Ri Bhoi District kum u kongsan bad u Giri Prasad Superin tendent of Police ka Ri Bhoi kum u symbud kongsan haka jingdonlang u Bah Bobby L Nongbet District Sports Officer, Ri Bhoi District, Bah RB Shadap President ka RBDSA, ki principal ki nonghikai bad ki khynnah skul kiba la shimbynta shitrhem ha katei ka sngi.
Ha katei ka lympung la wan ruh ban ïa shim bynta haduh 22 tylli ki skul bapher bapher na kylleng ka Ri-Bhoi District ki ban sa aireng haki lympung lehkai bapher bapher.
Haba kren ha katei ka sngi kum u kongsan u Arpit Upadhyaya Deputy Commissioner ka Ri Bhoi District u la ai ka jingïaroh ïaka ophis u DSO kaha la shim iaka sienjam ban pynlong Ia katei ka lympung kaba long kum ka rynsan iaki khun samla na kylleng ka dong Ri Bhoi ba kin ioh ban sei madan iaka sap ialehkai sports kaba ki don bad ai khublei khamtam iaki skul kiba la wan ban shim bynta shitrhem ha katei ka lympung najan bad na jngai.
Lyngba katei ka lympung ki khynnah ïalehkai kiba jop kin shah jied ruh ban leit ïashimbynta sha ka State Level ka ban sa long shen ha nongbah Shillong.