Dap 52 snem ka jingïoh jylla bapura ka Meghalaya, ai burom ïa u Lat ïa ki nongïaleh Hill State

Shillong, K’lyngkot, 20: Ka Jylla Meghalaya mynta ka sngi Saitjaiñ ka la rakhe ïa ka jingdap 52 snem ka jingïoh ïa ka jylla bapura ha ka jingïalang kaba la long ha District Auditorium and Library ha Tura.
U Lat ka Jylla u Phagu Chauhan u la long kum u Kongsan, u Myntri Rangbah ka Jylla u Conrad K Sangma kum u Symbud Kongsan, ka Myntri kaba peit ïa ka tnat I&PR ka Dr. Mazel Ampareen Lyngdoh ka la long kum ka kongsan ba kyrpang.
Ïa kane ka jingrakhe la pynlong ruh ha ki bynta bapher bapher jong ka jylla.
Haba kren ha kane ka sngi, u Lat u la ai khublei ïa ki paidbah nongshong shnong ka jylla Meghalaya bad u la ai burom ruh ïa ki nongïalam kiba la ïohi jngai ban ïakhun na ka bynta ban pynïoh ïa la ka jong ka jylla, ïa ki nongïaleh laitluid bad ïa baroh ki briew kiba la don bynta ban ïakhun pyrshah ïa ki shipai Phareng bad kiba la aiti lut ïa la ka jong ka jingim na ka bynta ban ïada ïa la ka jong ka lariti bad ïa la ka ri.
Da kaba pynpaw ïa ki jingkiew shaphrang ha baroh ki liang ha ka jylla, u Lat u la ong, “ka jingpynïasoh ïa ki surok bad ki lynti ki syngkien ka long kaba donkam ban tei ïa ka lawei jong ka jylla. Ka jingtrei shitom ka dang ïaid shakhmat ban shna ïa ki surok bad ïa ki jingkieng ha ki bynta bapher bapher jong ki district ka jylla. Ka Sorkar jong ngi ka la tei ruh ïa ki jaka ai jingsumar kum ki Hospital, ki CHC, PHC ha kylleng ka jylla khnang ban pynpoi ïa ki lad ai jingsumar sha ki shnong ba kyndong tam ha ka jylla. Ka dei ka jingsarong ïa ka jylla Meghalaya naba ka long kaba lai ha ka ri bad kaba nyngkong eh ha ka thaiñ Shatei Lammihngi ban don ïa ka Comprehensive Policy halor ka Mental Health and Social Care,” la ong u Lat ka Jylla.
Ha ka jingkren pynkut, u Lat u la kyntu ïa ka imlang ka sahlang ban ïatreilang ryngkat na ka bynta ban pyllait luid ïa ka jylla na u drok.
U Myntri Rangbah haba kren ha kane ka sngi u la ïathuh ïa ki kam pynroi kiba la pynsdang da ka Sorkar Jylla bad ong ruh ba ka jingpynlut jng ka Sorkar ka la long palat ar shah haba ïanujor bad ki san snem kiba ladep, ha kaba ha u snem 2017-2018 ka Sorkar ka la pynlut jin haduh 9000 klur ha u snem 2023-2024 bad jan 21,000 klur la pynlut ha ka Financial Year.
U la ïathuh shuh shuh, hapoh ka skhim PMGSY naduh u snem 2018 haduh mynta ka jingshna ïa ka surok ka la long haduh 2526 Kilometres na ka PMGSY, kaba la pynïasoh ïa ki 600 tylli ki shnong bad kaba ïapher na kaba ladep kaba long tang 70 tylli. Ka jingbhah pisa na ka bynta ban pynbna ïa ki ophis jong ki Block ka la ïaid shakhmat. Baroh 2500 tylli ki skul sorkar ki la ïoh pisa ban shna ïa ki ing skul kiba thymmai ne ban pyndep ïa ka jingmaramot ïa kiba la tor, u la bynrap.
Shuh shuh u Myntri Rangbah u la ong ruh ba ka jingphaikhmat kyrpang ka long ruh sha ki nongrep, ki kynthei bad ki khynnah jong ka jylla, la ka long ha kaba pynkha ïa ki Self Help Groups, ne lyngba ka rwai ka siaw, ka jingsengkam bad ka sport, kiba baroh ki la nang kiew shaphrang ha ka jylla.
Ka Myntri kaba peit ïa ka tnat I&PR ka Dr. Mazel Ampareen Lyngdoh ka la ong ba ka jingkiew shaphrang jong ka jylla ha kine ki snem ka dei ka jingïalam lynti jong u Myntri Rangbah Conrad K. Sangma. Ka la ong ba ka Sorkar ka la nang pynroi shuh shuh ïa ki tnat treikam kum ka Agriculture, Tourism, Power Generation, Education, Information Technology, Entrepreneurship bad baroh ki tnat treikam.
Kum ka jingrakhe ïa kane ka sngi, u Lat u la pyllait paidbah ïa ka jingrwai jong ka jylla ne ka State Anthem ba la thaw da u Bah (L) Neil Nongkynrih, u nongseng ïa ka Shillong Chamber Choir.
Ha kane ka sngi, la sam ïa ka khusnam Meghalaya Day sha u Bah Risingbor Kurkalang ïa ka ‘U Tirot Sing Award’ na ka bynta ka Arts & Literature, ka Dr. Delphine G. Momin ka la ïoh pdiang ïa ka Pa Togan Sangma Award na ka bynta ka Social Services bad u Bah Phrangki Buam u la ïoh pdiang ïa ka ‘U Kiang Nangbah Award’ na ka bynta ka Sports & Games.
15 ngut ki nongshong shnong ki la shah pynkup burom da ka Governor’s Police Medal na ka bynta u synniang u bynhei jong ki, 6 ngut la ai ïa ka Chief Minister’s Disaster Response Medal bad 21 la ai ïa ka Meghalaya Day Excellence Awards 2023.