Nongstoiñ, K’lyngkot 14: Ka wah Nonbah bad Nondeiñ ki dei ki ar tylli ki wah kiba tuid napdeng jong ka sor Nongstoiñ bad ka jingdon jong kitei ki wah kan long ka jingkyrkhu kaba khraw ïaa ki paitbah, lada ki nang ban leh khuid bad ba ka sorkar ka phai khmat kumno ban pynitynnad ïa ki baroh ar liang ki rud jong kitei ki wah.
Dang shen ha kine ki sngi la ïaohi ba ka Green Tech Foundation Meghalaya India, ka kynhun kaba trei na ka bynta ka khuid ka suba ha kylleng ki shnong hapoh ka jylla, ka don ka jingangnud bad ka da kwah eh ba ka wah Nonbah bad ka wah Nondeiñ, ki dei ban long ki wah kiba khuid bad kiba itynnad kiba lait na ka jingjaboh.
Hynrei na ka daw jong ka jingbym burom bad ka jingbret jaboh dusmon man la ka sngi, ka jingpyntuid ïaa ka um jakhlia ba ki sait ki khlieng hapoh dukan sha wah, ka jingïaaleh ban kyntur sha wah ha kaba shna ïaing.
Nangta ka jingbym kheiñ jong ki paitbah kiba ïaaid ba ïaeng ban bret jaboh ha surok bad ha wah kumjuh, ka la pynjaboh haduh katta katta ïaa kitei ki wah. Lada ka jingbret jaboh kan dang ïaai bteng na ka por sha ka por, khlem artatien ba kitei ki wah kin kylla long kum ka wah Umkhrah bad wah Umshyrpi.
Haba phai ha kawei pat ka liang ka Nongstoiñ ka don ïaa ki lai tylli ki bor ba dei peit ïa ka shnong ka thaw kaba nyngkong ka dei ka bor hima kaba hap ha ka jingpeit jingkhmih jong u Syiem, kaba ar ka dei ka Dorbar shnong New Nongstoiñ bad Upper New Nongstoiñ bad kaba lai ka dei ka Nongstoiñ Town Committee. Kitei ki lai tylli ki bor imat haduh mynta kim pat pei phang ha kaba ïaadei bad ka khuid ka suba bad ban sumar ïaa kitei ki wah.
Kum ban pynkynmaw ba dang ha ka 21 tarik Nohprah jong u snem ba la dep ka Green Tech Foundation Meghalaya (India), ka kynhun ba la lam khmat da u samla H.Ban Nonglang ryngkat bad ka kynhun da kaba ïaatrei lang bad ka Latynrai Eco Tourism Co-operative Society West Khasi Hills, ka la pynlong da ka cleaning drive ban pynkhuid ïaa ki jaboh jabaiñ kiba la pynlang shi jaka da kaba pynap da ka jar. Hynrei kin lah eh katno ban trei lada ki paitbah bad ki bor synshar shnong kim ïaatreilang.
