Nongpoh, K’Lyngkot 08: Ha kawei ka jingjia aksiden kaba shyrkhei, kawei ka longkmie ka la duh noh ïa la ka jingim hadien ba ki post elektrik ba la kit da kawei ka trok kila hap bad ban ïaka harud surok bah ha Umtrew, Ri-Bhoi District.
Katkum ka jingtip bala ioh lum la ong ba kane ka jingjia kala jia mynta ka janmiet haka por 4 baje eiei ha kaba katei ka longkmie bala tip kyrteng kum ka Kong Cleris Nongsiej (37) kaba shong ba sah haka shnong Umtrew kala shah ban kynsan haki post elektrik bala kit da kawei ka trok kaba don ïa u number JH 05 CX 4295 hadien ba katei ka trok kala lait haki ar bynta.
La ong ruh ba katei ka jingjia ba sngewsih kala jia haka por ba katei ka longkmie ka dang ïaid kjat ban leit phai shala iing hadien ba kala wan na ïing ïap briew, bad naka liang ki pulit ka Umsning Police Station tang hadien katei ka jingjia kila leit mar mar sha katei ka jaka ban pynlong ka jingtohkit.
Shuh shuh u nongñiah jong katei ka trok u la phet krad noh na katei ka jaka bad ki pulit ki dang thwet ban ioh kem ïa u.
Naka liang ki pulit kila pynkit noh ïa katei ka longkmie sha Civil Hospital Nongpoh ban pyndep ïaki jingdonkam bad ka jingtohkit halor katei ka jingjia ka dang ïaid shakhmat.
Kane ka long kmie ka la ïeh noh ïa hynriew 6 ngut ki khun na kane ka sla pyrthei.
