Ka drama khring kyrtong na ka bynta ka elekshon MLA kaban long ha u 2023 ka la sdang ban shongshit bha khamtam da ka jingpyrshang ki party heh ban khring ia ki MLA bad ki MDC na kiwei pat ki party khamtam ia kito ki kyrtong kiba i don jingkyrmen ban jop. Dang nyngkong eh la ïohi ba dei ka All India Trinamool Congress kaba sdang ban pyni ia ka bor da kaba phet haduh 12 ngut syndon na ka sem Congress ban leit iasoh sha katei ka party ba thymmai. Pynban tang hadien katto katne bnai pat la ïohi bad paw pyrthei ba na kitei ki 12 ngut kin don bun ngut kiban leit iasoh noh sha ka NPP. Watla bun ki kyntait ia katei ka jingkam ka NPP hynrei ym lah pat ban tip ba haduh katno ka don ka jingshisha hynrei ka por hi kam slem namar la kumno kumno ha shwa u Naiwieng – Nohprah ki hap beit ban mih noh na ka party ba ki don ban pynkhreh ia ka elekshon kaban long ha u Rymphang – Lber jong u 2023.
Dang ha kine ki khyndiat por la ïohi ruh ba bun ki MDC na kiwei ki party ki leit ban ïasoh sha ka NPP bad kumjuh sha ka UDP. Hynrei kumba long mynta hi kaba kham thnem hi ka jingkhring briew ka dei ha ka NPP. Kumban shu kdew hangne, ka elekshon MLA ha baroh ki 60 tylli ki constituency ka sah sa tang kumba khyndai bnai ei bad kane hi kadei ka por ïa ki nongthep vote ban phai dien aiu ki la ïoh na u nongmihkhmat jong ki ha kine ki saw snem bad kaei kaba u la wanrah ha ki shnong ki thaw jong ki ha kine ki snem baroh. Dei ruh ha kum kane ka por ba ki nongthep vote ki pynap shibun ki jingkylli na bynta u MLA ha shwa ba kin leit biang ban jied ïa u MLA uba thymmai ha u 2023. Dei ruh ha kum kane ka samoi ba ki paidbah ki ïoh ban pyrkhat bad bishar bniah namar bun kiwei pat ki kyrtong kin wan ban pynshai ne ban kular ha khmat jong ki ïa ka thong kaba ki kwah ban trei lada ki jop kum u MLA jong ki.
Bunsien hi ka jingrem noh jong ki MLA tang hadien shi samoi ba ki jop kadei namar ka jingkular jong ki bad ka kam kaba ki trei kam ïahap satia. Don ruh ki MLA kiba la mad noh ïa ka jingshah rem tang namar ba ynda ki la jop ki la kiar wat ban kynduh ïa ki nongthep vote khamtam eh ïa ki nongkyrshan la jong. Ka daw kaba hakhmat kaba ju long ka daw rem ïa ki kadei ba kaei kaba ki kular ha shwa ka elekshon kam ïahap wat tang shi pawa na kaba ki pyndep. Ka jingmih jong ki nongïalam ban leit kyrshan sha kiwei pat ki kyrtong ba thymmai ynda la jan ka elekshon ruh kadei ka dawbah kaba pynrem ïa ki.
Hynrei ha kawei pat ka liang, don ki nongmihkhmat kiba trei shisha na ka bynta ki paidbah nongthep vote hynrei tang namar ki klet noh ban burom ïa ki nongïalam, ynda la dei ka por ban jied biang ïa ki nongmihkhmat, bun ki shah pynbiej noh ha kiwei ki kyrtong. Ym lah ban len ba ki don ki nongïalam kiba lah ban pynkohnguh ïa ki spah ngut ki nongkyrshan ruh ha ka por elekshon bad kane hi kadei kaba ktah bha ïa ki kyrtong lada jia ba kim lah ban pynhun ne pynbiang ïa kum kitei ki nongïalam.
Ka saiñpyrthei hi ha Meghalaya ka pher bha bad la ju ïohi ruh ba man ka san snem kumba 20 haduh 30 ngut ki MLA ki ju shah rem bad mih bujli da kiba thymmai. Katkum ka jingïohi kane ka lah ban dei ruh na ka rukom sam ne pynpoi ïa ki skim kam pynroi sha ki shnong ki thaw ne ki iing ki sem. Ki nongïalam jong ki unit bapher bapher kim dei satia ban shaniah tylli tang ha iwei ne ar tylli ki nongïalam hynrei ban da don ki briew kiba peit pyrman man la ki unit khnang ba ki kam pynroi kin ym poi tang ha ki bahaiing jong ki nongkitkam jong ki unit. Kane ka ju jia beit ha man la ki constituency bad kane hi kadei ka daw kaba hakhmat eh kaba u MLA um ju tip ei ei ïa kaei kaba ki nongkitkam ki leh hynrei ha kaba khatduh dei ma u ba mad ïa ka jingshah rem.
Ka por mynta ka la ih bha ruh na ka bynta ki kynhun kiba ju wad jingtip lyngba ka RTI ban tip ïa ki kam pynroi kiba poi ha ki shnong ki thaw. Kito ki kynhun kiba smat ban wad ïa kum kitei ki jingtip ki dei ruh ban da wad bniah hato kiba ïoh ïa kitei ki skim kam pynroi na u nongmihkhmat kidei kiba dei hok shisha ban ïoh ne dei pynban da ki bahaiing suda jong ki nongkitkam ha ki shnong ki thaw. Lada ki lap ba kadei pynban ka skim tang na ka bynta ki bahaiing ki dei ban pynshai paidbah khnang ba kiba bun balang kin tip bad kin ïoh ruh ban rai ha ka por thep vote.
Ki paidbah ki dei ruh ban husiar ba ha ka por thep vote kim dei satia ban shah pynngop noh shi khyllipmat tang ha ki tyngka pliah hynrei ban ieng beit ha ka nongrim.
